Խմբագրական. Ուղղակի իշխանություններին քննադատելը ամենահեշտ գործն է

Ինչպես արդեն հայտարարել են իշխանական թիմի ներկայացուցիչները, նոր Ընտրական օրենսգրքի նախագիծը դեռ ենթակա է քննարկման և դեռ շատ բան փոխելու ժամանակ կա, իրենք էլ պատրաստ են լսել բոլոր առաջարկները: Մնում է, որ ընդդիմադիր պատգամավորները, քաղաքական գործիչները գոնե առաջիկա մի քանի օրերին հիշեն, որ իշխանություններին հայհոյելուց և դրանով իրականում շատերի ուշադրությունը շեղելուց ավելի կարևոր գործեր էլ կան, մասնավորապես նման լուրջ գործընթացներին մասնակցությունը:

Իհարկե, ներկայացված նախագծում վիճելի, նույնիսկ անհասկանալի կետեր կան, բայց դրանում զարմանալի ոչինչ չկա: Ընդդիմադիր ուժերն էլ հենց նրա համար են, որ այսպիսի դեպքերում ակտիվ կերպով հանդես գան առաջարկներով, ներկայացնեն իրենց տարբերակները և ձգտեն հասնել որոշ կետերի փոփոխության, մանավանդ ներկայացված տարբերակում էլ տարբեր ընդդիմադիր ուժերի կողմից առաջարկված որոշ կետեր արդեն ներառված են: Բնական է, որ իշխանություններն էլ առաջին հերթին հաշվի են առնելու իրենց շահերը և չեն ցանկանա հեշտությամբ հրաժեշտ տալ ընտրությունները կեղծելու մեխանիզմներին, բայց իր տեղում գտնվող ընդդիմության խնդիրն էլ հենց պայքարելը պետք է լինի և թեկուզ ճնշում գործադրելու միջոցով անհրաժեշտ փոփոխությունների հասնելը:

Այնպես որ՝ սա առաջին հերթին լավ հնարավորություն է մեր ընդդիմության համար դրսևորվելու, վերջապես կառուցողական ինչ-որ գործունեությամբ զբաղվելու, ինչ-որ բանով ժողովրդին իսկապես օգտակար լինելու, թե չէ ուղղակի իշխանություններին քննադատելը ամենահեշտ գործն է:

Կարեն Վարդանյան