Զախարյանի անակնկալը՝ Յոլյանին

Բոլորդ եք, հավանաբար, հիշում, թե ինչ մեծ աղմուկ բարձրացրեց Երվանդ Զախարյանի նախաձեռնությամբ՝ Հայաստանի կողմից վերցրած վերջին վարկերից մեկ: Խոսքը, մասնավորապես, 30մլն դոլար արժողությամբ վարկի մասին է:

Պարզվում է՝ ՀՀ կառավարությունը վերջապես հրապարակել է համաշխարհային բանկից ներգրաված այս տխրահռչակ վարկի ծախսման ծրագիրը. գումարի մոտ 70%-ը ծրագրվում է տրամադրել Երևանի ՋԷԿ-ին, մյուս մասը՝ ՀԱԷԿ-ին: Այս ամենում, սակայն, ամենաուշագրավն այն է, որ պարզվում է՝ Հայաստանի էներգահամակարգի ձեռնարկություններն աստղաբաշխական պարտքեր են կուտակել իրենց գործունեության հետ որևէ կապ չունեցող պատճառներով: Խոսքը, մասնավորաբար, Երևանի ՋԷԿ-ի և «Որոտանի» կասկադի մասին է, որոնք գտնվելով ծայրահեղ ծանր ֆինանսական դրության մեջ, մոտ 100 միլիոն դոլարի հասնող պարտքեր են տվել «Նաիրիտին» և Վանաձորի «Քիմպրոմին»:

Այսինքն՝ հայրենի կառավարությունն այս ընկերությունների անունով բարձր տոկոսներով վարկեր է վերցրել և դրանցով վճարել «Նաիրիտի» ու «Քիմպրոմի» աշխատակիցների աշխատավարձերը. ընդամենը՝ 100մլն դոլար: Իհարկե, դժվար է ասել՝ արդյոք այդ ամբողջ գումարն ուղղվել է նշված նպատակի՞ն, թե՞ ոչ, բայց փաստը մնում է փաստ, որ այդ 100 միլիոն դոլարի վրա ժամ առ ժամ տոկոս է գալիս. միայն վերջին երկու ամսվա ընթացքում մոտ 600 հազար դոլար:

Սա էլ ձեզ, ինչպես ասում են, Երվանդ Զախարյանի «խերը»: Մարդը մինչև վերջ իրենը արեց՝ հավատարիմ մնալով «ինձանից հետո՝ թեկուզ ջրհեղեղ» հայտնի սկզբունքին: Իհարկե, համարել, թե այս ամենի հետևում կանգնած է բացառապես Երվանդ Զախարյանի անձը, սխալ կլիներ. Զախարյանն ընդամենը համակարգի մի մասնիկն էր՝ հավատարիմ ու նվիրված, բայց ընդամենը մի օղակ, որը չէր կարող գործել հակառակ համակարգին բնորոշ տրամաբանությանը: Այս ամենում, սակայն, ամենաշատը Յոլյանի բախտը չի բերել. հիմա նա ստիպված է լինելու մաքրել այն կեղտոտ հետքերը, որ Զախարյանը թողել է իր հետևից՝ հեռանալով նախարարի պաշտոնից: Այս ամենը ստիպում է մեզ ենթադրել, որ Յոլյանին ամենևին էլ հեշտ օրեր չեն սպասվում իր նոր պաշտոնում, ու շուտով նա ստիպված է լինելու պատասխանել լրագրողների տհաճ հարցերին՝ կապված ոչ միայն սույն վարկի պատմության հետ, այլև, որ ենթադրելի է, Զախարյանի կատարած այլ թաքուն գործերի համար ևս…

 Դավիթ Բաբանով