Մահացել է Ֆրենկ Սինատրայի որդին

Ֆլորիդայի նահանգի Դայթոն Բիչ քաղաքում կյանքի 73-րդ տարում վախճանվել է ամերիկացի լեգենդար երգիչ և դերասան Ֆրենկ Սինատրայի որդին: Ինչպես տեղեկացնում է «Արմենպրես»-ը, մարտի 17-ին այս մասին հայտնել է Associated Press-ը՝ վկայակոչելով նրա հարազատներին:

Նախնական տվյալներով՝ Ֆրենկ Սինատրա Կրտսերի մահվան պատճառ է դարձել սրտի կանգը:

Ըստ Reuters-ի տեղեկատվության՝ Սինատրա Կրտսերը պետք է Դայթոն Բիչում կատարեր իր հոր մի քանի երգերը, սակայն համերգը վերջին պահին չեղյալ է հայտարարվել նրա վատ ինքնազգացողության պատճառով: Տեղական Daytona Beach News-Journal հրատարակությունը գրել է, որ Սինատրա Կրտսերը մահացել է հիվանդանոցում:

Ֆրենկ Սինատրան (1915-1998) «Գրեմի» մրցանակի տասնակի և բազմաթիվ այլ պարգևների մրցնակակիր է: Նրան համարում են XX դարի երաժշտական ինդուստրիայի լեգենդ: 50 տարվա ակտիվ ստեղծագործական գործունեության ընթացքում երգիչը ձայնագել է շուրջ 100 հանրաճանաչ կոմպոզիցիաներ՝ առավելապես ռոմանտիկական բալլադներ:

Բացի այդ, Սինատրան նկարահանվել է 60-ից ավելի կինոնկարներում, որոնցից առավել հայտնի են «Արձակում քաղաք», «Այսուհետև և առհավետ», «Ոսկե ձեռքով մարդը», «Բարձր հասարակություն», «Հպարտություն և կիրք», «Օուշենի տասնմեկ ընկերները» (1960) և «Մանջուրացի թեկնածուն» ֆիլմերը: