Ռուբեն Սևակի անունը կտրվի Արաբկիրի 21-րդ փողոցին

Արաբկիրի 25-րդ փողոցի փոխարեն Ռուբեն Սևակի անվամբ կանվանակոչվի Արաբկիրի 21-րդ փողոցը: «Արմենպրես»-ի փոխանցմամբ' այս մասին որոշումն ընդունվեց Երևանի ավագանու մարտի 18-ի նիստում: Երևանի քաղաքապետ Տարոն Մարգարյանը հետաքրքրվեց' արդյոք ավագանու անդամների մոտ կա՞ն դեմ կարծիքներ: Որոշումն ընդունվեց միաձայն քվեարկության արդյունքում:

Երևանի ավագանու 2015 թվականի հունիսի 24-ի N 351-Ն որոշմամբ Երևան քաղաքի Արաբկիրի 25-րդ փողոցն անվանակոչվել էր բանաստեղծ, հրապարակախոս, բժիշկ Ռուբեն Սևակի անվամբ։ «Չիլինգարյան (Մամիկոնյան) տոհմ պատմաազգագրական» հասարակական կազմակերպությունը նախատեսում է իր տոհմակցի'Ռուբեն Սևակի անվան փողոցում իրականացնել բարեկարգման աշխատանքներ՝ տեղադրել կիսանդրի, փակցնել ցուցանակ: Քանի որ անվանակոչված փողոցն ունի ռելիեֆային անհարթություն, չկան մայթեր, հնարավոր չէր նշված աշխատանքներն իրականացնել։

«Չիլինգարյան (Մամիկոնյան) տոհմ պատմաազգագրական» հասարակական կազմակերպությունը, Երևանի Ռուբեն Սևակի անվան թիվ 151 դպրոցի տնօրինությունը և Հայաստանի գրողների միությունը հանդես էին եկել միջնորդությամբ՝ Արաբկիրի 25-րդ փողոցի փոխարեն Ռուբեն Սևակի անվամբ անվանակոչել Արաբկիր 21-րդ փողոցը։