Արտգործնախարարությունը և ՌԴ-ում ՀՀ դեսպանատունը լուռ են. քաղաքացիները պահանջում են Լևոն Հայրապետյանին ազատ արձակել

Արցախցի բարերար Լևոն Հայրապետյանին ՌԴ-ում օրեր առաջ դատապարտեցին 4 տարվա ազատազրկման։ Գործարարը մոտ մեկ տարի անցկացրել է քննչական մեկուսարանում, ապա տնային կալանքի պայմաններում։ Նրա փաստաբաններն այն ժամանակ պահանջել են փոխել խափանման միջոցը՝ ներկայացնելով պաշտպանյալի ծանր առողջական վիճակի մասին վկայող փաստաթղթեր։ Լևոն Հայրապետյանը երկրորդ կարգի հաշմանդամ է, չորս ինֆարկտ և երկու ինսուլտ է տարել, տառապում է քաղցկեղով, ուռոլոգիական խնդիրներ ունի, դժվար է տեղաշարժվում: Այս ամենը հաշվի չառնելով՝ դատարանը նրան դատապարտեց։

Վաղը՝ ապրիլի 19-ին, ժամը 13։00-ին մի խումբ քաղաքացիներ ՀՀ ԱԳՆ-ին և ՌԴ դեսպանատանը նամակներ են փոխանցելու՝ ներկայացնելու իրենց դժգոհությունը դատարանի վճռի վերաբերյալ։ 

«Այս օրերին, երբ Արցախն առավել քան կարիքն ունի իր բարերարի, դժբախտ պատահականությամբ նա կալանավորվում է: Ողջ հայ ժողովուրդը պահանջում է ամեն կերպ ազատ արձակել բարերարին, սակայն իշխանությունները, մասնավորապես Արտաքին գործերի նախարարությունը, ՌԴ-ում ՀՀ դեսպանությունը քար լռություն են պահպանում: Մենք՝ ՀՀ քաղաքացիներս, պահանջում ենք արտաքին գերատեսչությունից անհապաղ կապ հաստատել իրենց ՌԴ գործընկերների հետ և ամեն խողովակով փորձել հասնել Լևոն Հայրապետյանի ազատ արձակմանը»,- հայտարարում են հավաքի կազմակերպիչները։

Նշենք, որ գործարար Լևոն Հայրապետյանն այդպես էլ չի ընդունել Բաշկիրիայի նախկին սենատոր Իգոր Իզմեստևի մորից 700 հազար դոլար հափշտակելու մասին իրեն առաջադրված մեղադրանքները։