Առանձնապես խոշոր չափերի «Մետամֆետամինը» Երևանից չհասավ Բանգկոկ

Մտահոգությունը, որ Հայաստանը մի շարք պետությունների քաղաքացիների մուտքն այստեղ սահմանելով առանց վիզայի ռեժիմի, այսինքն' բաց սահմանների քաղաքականություն վարելով, կարող է դառնալ թմրամիջոցների տարանցիկ երկիր, դարձել է իրականություն: Հայաստանի Հանրապետությունն այդպես վարվեց հանուն զբոսաշրջության զարգացման, ինչպես նաև հետևելով, այսպես կոչված, «միջազգային հանրության» հորդորներին կամ խորհուրդներին:

Քրեական գործի նախաքննությամբ պարզվել է, որ Իրանի Իսլամական Հանրապետության քաղաքացի Մոհամմադ Դավուդի Քարբալայի Հոսեյինը 2015թ. դեկտեմբերի 24-ին մուտք գործելով ՀՀ, նույն օրը ԻԻՀ քաղաքացիներ Մաջիթ Մոհամմադհոսեինի Ֆարուհարարջմանդիից և Մորսալ Հոսսեյնի Զոհիրիից իրացնելու նպատակով, ապօրինի ձեռք է բերել, պահել ու փոխադրել առանձնապես խոշոր չափերի (2526.049 գրամ մաքուր քաշով) «Մետամֆետամին» տեսակի թմրամիջոց:

Ըստ մեղադրական եզրակացության, Մ. Հոսեյինը նպատակ ունենալով այն տեղափոխել Հայաստանից, 2015թ դեկտեմբերի 27-ին ՀՀ մաքսային սահմանով, «Զվարթնոց» օդանավակայանով, «Երևան-Կիև-Բանգկոկ» ավիաչվերթով փորձել է նշված թմրամիջոցը մաքսանենգությամբ տեղափոխել Թաիլանդ, ինչը նրան չի հաջողվել: Հասկանալի է, որ առանձնապես խոշոր չափերի «Մետամֆետամինը» Հայաստանում չի արտադրվել, այն ՀՀ է բերվել Իրանից կամ մեկ այլ պետությունից, որից հետո փորձ է արվել այստեղից տանել Թաիլանդ:

շ
Վերը նշված արարքների համար Մոհամմադ Հոսեյինին մեղադրանք է առաջադրվել ՀՀ քրեական օրենսգրքի 34-215-րդ հոդվածի (մաքսանենգության հանցափորձը) 2-րդ մասի և 266-րդ հոդվածի («Թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելը») 3-րդ մասի 2-րդ կետի հատկանիշներով, որպես խափանման միջոց ընտրվել է կալանքը: