Թե ինչ արժեցավ դյուրահավատությունը էլեկտրոնիկայի խանութում ձևակերպումներից հետո

Ծանոթանալով այս իրական պատմությանը, ոմանք, կարծում ենք, հետևություններ կանեն, թե իրենց դյուրահավատությունը, ֆինանսական հարցերում անգամ ծանոթին հեշտությամբ վստահելն ու նրան հավատալն ինչ ավարտ կարող է ունենալ:

Քրեական գործի նախաքննությամբ պարզվել է, որ քաղաքացի Աշոտ Բարխյանը ուրիշի գույքը խարդախությամբ հափշտակելու դիտավորությամբ, գործով չպարզված օրը, հանդիպել է համաքաղաքացի, Երևանի բնակիչ Էդվարդ Մարտիրոսյանին և վերջինիս խնդրել նրա անվամբ ապառիկ կարգով ձեռք բերել համակարգչային տեխնիկա:

Համաձայն քր. գործի նյութերի, Է. Մարտիրոսյանին թյուրիմացության մեջ գցելու և գործարքը կատարելու համաձայնությունը ստանալու նպատակով, Ա. Բարխյանը նրան խոստացել է հետագայում վարձահատույց լինել և պարտաճանաչ կատարել ամսեկան վճարները: Ըստ մեղադրական եզրակացության, Ա. Բարխյանը նույն օրն երեկոյան կրկին հանդիպել է Է. Մարտիրոսյանին և նույնաբովանդակ խոստումների արդյունքում ստացել նրա համաձայնությունը, որից հետո Է. Մարտիրոսյանին ուղեկցել է Երևանում գործող «Վիելվի Սենթր» ՍՊԸ-ի էլեկտրոնիկայի խանութ: Այստեղ Ա. Բարխյանը Է. Մարտիրոսյանի անվամբ համապատասխան ձևակերպումների կատարմամբ ձեռք է բերել հեռուստացույց, սակայն հետագայում չկատարելով ժամանակացույցով նախատեսված վճարները, խաբեությամբ հափշտակել է այն, Է. Մարտիրոսյանին պատճառելով 250 000 դրամի գույքային վնաս:

Վերը նշված արարքների համար Է. Մարտիրոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասի և 216-րդ հոդվածի 1-ին մասի հատկանիշներով: