Հաշվեհարդարի թիրախը ՀԷՑ-ի հաշվիչներն են եղել

Քրեական բնույթի արարքներում երբեմն հանդիպում են կուրիոզ դեպքեր, և ստորև ներկայացվողը, կարծում ենք, դրանցից մեկն է: Ինչպես պարզվել է քր. գործի նախաքննությամբ, քաղաքացի Մարտիրոս Ղազարյանը 2015թ. նոյեմբերի 4-ին, ժամը 23:30-ի սահմաններում գտնվելով Երևանի Բագրատունյաց պողոտայի թիվ 36 շենքի շքամուտքում, ուրիշի գույքը վնասելու դիտավորությամբ աջ ձեռքով հարվածներ է հասցրել նշված շենքի 1-ին մուտքի 1-ին հարկի պատին ամրացված «Հայաստանի էլեկտրական ցանցեր» ընկերությանը պատկանող թվով 5 էլեկտրական հաշվիչներին ու վնասել դրանք: Ըստ մեղադրական եզրակացության՝ Մ. Ղազարյանն այդպիսով ՀԷՑ ՓԲԸ-ին պատճառել է 164 533 դրամի նյութական վնաս:

Բոլորս էլ գիտենք, որ բնակիչների էլեկտրական հաշվիչները վաղուց արդեն դրված են կողպեքով փակված մետաղյա արկղերում, որոնք ընդամենը փոքրիկ դիտանցքեր ունեն՝ ցուցմունքները դիտելու համար: Առանց այդ արկղը բացելու, ձեռքի հարվածներով հնարավոր չէ վնասել դրանում գտնվող հաշվիչները, իսկ եթե Մ. Ղազարյանը, այնուամենայնիվ, ինչ-որ կերպ բացել է այն, ապա ձեռքի ուժը հաշվիչներից հինգի վրա փորձելուց առաջ, ինչպե՞ս չի վախեցել հոսանքահարվելուց և ինչպես չի հոսանքահարվել: Մնում է ենթադրել, որ այդ առումով բախտն ուղղակի բերել է կամ էլեկտրիկի գիտելիքներ է ունեցել և իմացել է հաշվիչների խոցելի տեղը:

Մեկ այլ հարց է, թե Ղազարյանն ինչո՞ւ է կատարել այդ հանցավոր արարքը: Եթե բնակիչներից մեկի հետ խնդիր է ունեցել ու ցանկացել է հաշվիչը շարքից հանելով, նրան ժամանակավորապես հոսանքազրկել, ապա ինչո՞ւ է վնասել չորս այլ բնակարանների հաշվիչներ, իսկ եթե դիտավորությունը հենց վերոնշյալ ընկերությանը վնաս տալն է եղել, ինչն ավելի տրամաբանական է, քանի որ հաշվիչները ՀԷՑ-ին են պատկանում, ապա ընկերության ո՞ր արարքը կամ ինչն է նրան մղել այդ քայլին: Գուցե էլեկտրաէներգիայի սակագների անհիմն բարձրացո՞ւմը, որն անցած տարի շատ բնակիչների տրամադրեց ՀԷՑ-ի դեմ:

Վերը նշված արարքի համար Մարտիրոս Ղազարյանին մեղադրանք է առաջադրվել ՀՀ քրեական օրենսգրքի 185-րդ հոդվածի («Գույքը դիտավորությամբ ոչնչացնելը կամ վնասելը») 1-ին մասի հատկանիշով: