Ինչո՞ւ կրկին հետաձգվեց «Նաիրիտի» սնանկության գործով դատական նիստը

Այսօր Շենգավիթ վարչական դատարանում նշանակված էր «Նաիրիտ» գործարանի սնանկության գործով դատական հերթական նիստը։ Նիստը հետռաձգվեց։ Հաջորդ դատական նիստը տեղի կունենա օգոստոսի 26-ին։ Դատարանում ներկա է մոտ 50-60 նաիրիտցի։

Նշենք, որ ՀԷՑ-ը Երևանի Շենգավիթ վարչական դատարան է դիմել անցած տարվա ապրիլի 7-ին: ՀԷՑ-ը դատի է տվել նաև մի շարք այլ ընկերությունների՝ պահանջելով նրանցից պարտքերի վճարում օգտագործած էլեկտրաէներգիայի դիմաց: Ըստ ՀԷՑ-ի՝ «Նաիրիտի» պարտքը 2010 թվականից է և ներկայումս կազմում է 1.2 միլիարդ դրամ: Գործը քննում է դատավոր Արմեն Չիչոյանը: 

Արդեն մեկ տարի է՝ դատական նիստն ընթանում է, ամեն անգամ այն հետաձգվում է՝ տարբեր պատճառաբանություններով։ Հարկ ենք համարում նիստի հետաձգման մի քանի պատճառ նշել։ Նաիրիտցիներն ակտիվ պայքար են սկսել գործարանի վերագործարկման պահանջով։ Էներգետիկայի և բնական պաշարների նախարար Լևոն Յոլյանը հավաստիացնում է՝ գործարանն աշխատելու է, իրենք քննարկելու են բոլոր հնարավոր ներդրողների առաջարկները։ Եվ հիմա, այս պայմաններում դատական նիստի ժամանակ սնանկ ճանաչել գործարանը, կնշանակի՝ վերջնականապես գործարանը փակել, մոռանալ բոլոր խոստումները։ Դա էլ իր հերթին կբարձրացնի բողոքի մեծ ալիք։ Շատերին թվում է, թե նաիրիտցիների աշխատավարձերի պարտքերի մարումով ամեն հարց փակվեց, մարդկանց այլևս չի հետաքրքրում գործարանի ճակատագիրը։ Դա բնավ այդպես չէ։ 

Գործարանը սնանկ ճանաչելու պարագայում մեծ թվով նաիրիտցիներ կրկին ոտքի կելնեն, նաիրիտցիներին կմիանան կուսակցություններ, հասարակական կազմակերպություններ, շղթայական ռեակցիան ուժեղ կլինի։ Պատերազմական այս իրավիճակում, իշխանություններին ամենաքիչը դա է հարկավոր՝ նոր բողոքի ալիք իրենց դեմ։ Եվ հենց սրանից էլ իշխանությունները վախենալով, փորձեցին հետաձգել դատական նիստը՝ 4 ամիս ժամանակ շահելով։ Թե ինչպիսի որոշում կկայացվի, ժամանակը ցույց կտա։