Համաշխարհային պրեմիերայից՝ մինչև վարպետաց դաս. Կարեն Հակոբյանը Հայաստանում է

Երիտասարդ դաշնակահարներին եզակի հնարավորություն տրվեց «Նարեկացի» արվեստի միության կողմից:

Միայն մեկ օր, միայն «Նարեկացի» արվեստի միությունում, մայիսի 17-ին՝ ժամը 18:00-ին, երիտասարդ դաշնակահարներին եզակի հնարավորություն է ընձեռվում մասնակցելու ամերիկահայ դաշնակահար, կոմպոզիտոր Կարեն Հակոբյանի վարպետաց դասին:

Աշխարհի տարբեր բեմերում և սիմֆոնիկ նվագախմբերի հետ հանդես եկած, բազմաթիվ միջազգային մրցույթների մասնակից և դափնեկիր Կարեն Հակոբյանը ներկա դաշնակահարների հետ կկիսվի իր՝ դեռևս երիտասարդ, սակայն բավականին հետաքրքիր ու հարուստ փորձով:

Նա բաց դասի մասնակիցներին կփոխանցի իր մասնագիտական մոտեցումն ու սեփական հայացքը դաշնամուրային կատարման վերաբերյալ:

Վարպետաց դասին մասնակցել ցանկացողները կարող են ներկայանալ առանց տարիքային սահմանափակման՝ պատրաստած ունենալով առնվազն 2, ոճով իրարից տարբերվող ստեղծագործություն:

Անհրաժեշտ է մինչև մայիսի 16-ը ձեր մասնակցությունը հաստատել՝ զանգահարելով (010) 58 01 05, (011) 20 10 20, (077) 58 05 35, (091) 73 34 02) հեռախոսահամարներով կամ անձամբ ներկայանալ «Նարեկացի» արվեստի միություն՝ Վարդանանց 16/1 հասցեով:

Բաց մի թողեք մասնագիտական ինքնազարգացման այս լավ հնարավորությունը:

Վարպետաց դասից հետո իր մի քանի կատարումներով ելույթ կունենա Կարեն Հակոբյանը:

Մուտքն ազատ է:

Հիշեցնենք, որ Կարենը Հայաստան է ժամանել հայ-ճապոնական համագործակցության շրջանակներում, որի շրջանակներում էլ օրերս Արամ Խաչատրյան համերգասրահում դիրիժոր Հիսայոշի Ինոյեի (Ճապոնիա) և Հայաստանի պետական ֆիլհարմոնիկ նվագախմբի հետ համատեղ համերգով է հանդես եկել: