Ադրբեջանը հետ է կանգնել Վիեննայում Կասպշիկի գրասենյակի առնչությամբ պայմանավորվածությունից

Պաշտոնական Բաքուն դեմ է արտահայտվել ԵԱՀԿ գործող նախագահի անձնական ներկայացուցիչ Անջեյ Կասպշիկի գրասենյակի լիազորությունների ավելացմանը: Ինչպես հաղորդում է «Արմենպրես»-ը, այս մասին ադրբեջանական ANS գործակալությանը տված մեկնաբանության մեջ ասել է Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի ղեկավար Նովրուզ Մամեդովը:

Մեկնաբանելով ԵԱՀԿ Մինսկի խմբի հայտարարությունը՝ նա ասել է. «Անջեյ Կասպշիկի լիազորություններում առարկայական փոփոխություններ չեն կարող լինել: Հայտարարության մեջ ասվածը Մինսկի խմբի դիրքորոշումն է, մենք այս հարցում որևէ պատասխանատվություն չենք վերցրել մեզ վրա»:

ԵԱՀԿ Մինսկի խմբի համանախագահող երկրները Վիեննայում մայիսի 16-ին կայացած հանդիպման արդյունքներով հայտարարություն էին տարածել: Հայտարարության մեջ ասվում էր. «ԱՄՆ-ի պետքարտուղար Ջոն Քերին, ՌԴ արտգործնախարար Սերգեյ Լավրովը, Ֆրանսիայի եվրոպական հարցերով պետքարտուղար Արլեմ Դեզիրը, ներկայացնելով ԵԱՀԿ Մինսկի խմբի համանախագահող երկրները, մայիսի 16-ին հանդիպել են Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հետ՝ առաջ մղելու Լեռնային Ղարաբաղի հակամարտության խաղաղ կարգավորման գործընթացը: Նրանք վերահաստատել են, որ հակամարտությունը ռազմական լուծում չունի և պնդել են 1994թ. զինադադարի և 1995թ. զինադադարի ամրապնդման մասին համաձայնագրերի անշեղ իրագործման անհրաժեշտությունը:

Նախագահները վերահաստատել են հանձնառությունը հրադադարի պահպանմանն ու հակամարտության խաղաղ կարգավորմանը: Հետագա բռնությունների ռիսկը կրճատելու համար նրանք համաձայնել են հնարավորինս կարճ ժամանակում ամբողջացնել հետաքննության մեխանիզմների ներդրումը: Նախագահները նաև համաձայնել են ԵԱՀԿ գործող նախագահի անձնական ներկայացուցչի թիմի կարողությունների ավելացման շուրջ: Նրանք համաձայնել են նաև անհայտ կորած անձանց տվյալների փոխանակմանը Կարմիր խաչի հովանու ներքո, որի շուրջ նախագահները համաձայնություն էին ձեռք բերել նաև 2014թ. հոկտեմբերին Փարիզի գագաթնաժողովի ժամանակ:

Նախագահները համաձայնել են հակամարտության բազմակողմանի լուծման հասնելու բանակցությունների վերսկսման նպատակով անցկացնել քննարկումների հաջորդ փուլը, որը կկայանա հունիսին, վայրը դեռևս պետք է համաձայնեցվի»: