Ո՞ր ոլորտները կոռոպցիոն ռիսկերի դեմ ամենաթույլ իմունիտետն ունեն. Թևան Պողոսյանի հարցը

Ազգային ժողովը շարունակում է քննարկել ՀՀ Վերահսկիչ պալատի 2015թ. տարեկան հաշվետվությունը:

ԼՈւՐԵՐ.com-ի տեղեկացմամբ՝ պատգամավոր Թևան Պողոսյանը հարակից զեկուցող ֆինանսավարկային և բյուջետային հարցերի մշտական հանձնաժողովի ներկայացուցիչ Սուքիաս Ավետիսյանին հարց ուղղեց:

Պատգամավորը մասնավորապես հարցրեց, թե ո՞ր ոլորտն է մանրակրկիտ ստուգվել և պարզվե՞լ է, թե որ համակարգն է, որ կոռուպցիոն ռիսկերին ամենաթույլ իմունիտետն ունի, և ի՞նչ օրենսդրական փոփոխություններ են անհրաժեշտ խնդիրը լուծելու համար:

«Ո՞ր ոլորտն է, որի վրա պետք է ավելի մեծ ուշադրություն դարձնենք, ավելի հետևողական լինենք, որ կարողանանք մեր այսօրվա բացերը, խութերը, թույլ կողմերը, որոնք բացահայտվեցին ապրիլյան դեպքերից, հետո ավելի արագ ձևով իրականացնենք, ոչ թե դանդաղ քայլերով»,- ասաց պատգամավորը:

Սուքիաս Ավետիսյանի խոսքով՝ ոլորտները երեքն են՝ սոցիալական, դեղերի շուկայի չարաշահումները և գյուղատնտեսության բնագավառի վարկային խնդիրների հետ կապված: 

Թևան Պողոսյանի հստակեցում պահանջեց՝ ոլո՞րտն է վատը, թե՞ եղած ինստիտուտները:

Պատասխանելով պատգամավորի հարցին՝ Սուքիաս Ավետիսյանն ասաց, որ իրենք խոսում են ոլորտում որոշակի ուղղություններում տեղ գտած համակարգային խնդիրների մասին, և ընթացիկ հաշվետվությունների մեջ հստակ նշվել է նախարարությունների կատարած աշխատանքները, որոնք կատարվել են այդ թերությունների վերացման համար: