Դերվիշի պես գնացեք զորամասեր, տեսեք ինչով են սնվում զինվորները

Մեր այն ղեկավարներին, ովքեր իսկապես մտածում են Հայոց բանակի, նրա զինվորների ֆիզիկական, առողջական, բարոյահոգեբանական վիճակի մասին, ոչ թե ձևեր են թափում, այլ իսկապես մտածում են և ուզում են իրավիճակ փոխել, ովքեր ունեն դրա հնարավորությունը, կարելի է մի բան առաջարկել. անակնկալ գնացեք և անակնկալ մտեք զորամասերի ճաշարաններ, գնացեք օրվա տարբեր ժամերի, առավոտյան և երեկոյան գնացեք ու տեսեք, թե մեր զինվորներն ինչով են սնվում:

Մեզ տեղեկություն հասավ, որ Արցախում զորամասերից մեկի հրամանատարի կինը նույնիսկ տանը թխվածքեղեն է պատրաստել ու բերել զինվորներին, ընդ որում, սա տեղի է ունեցել մինչև քառօրյա պատերազմը: Տվյալ զորամասի զինվորները գոհ են եղել նաև զորամասի ճաշարանում տրվող սննդամթերքից: Հետևաբար ասել, թե բոլոր զորամասերում զինվորների սնվելու նկատմամբ վերաբերմունքը վատ է, բոլոր զորամասերի ճաշարաններում չարաշահումներ կան, տրվող սննդամթերքն իր որակով ու քանակով չի համապատասխանում սահմանված չափորոշիչներին, կնշանակի մեղք գործել սեփական խղճի նկատմամբ: Սակայն, նույնը կնշանակի նաև պնդելը, թե բոլոր զորամասերում զինվորներին տրվող սննդամթերքը որակի, տեսականու, քանակի առումով հենց այն է, ինչ նախատեսված է: Իրավապահ մարմինները բացահայտում են այս ոլորտում առկա չարաշահումները, մեղավորներին կանչում քրեական պատասխանատվության, սակայն այդ բացահայտումները վերաբերվում են իրականում եղած չարաշահումների սոսկ մի մասին: Թերևս փոքր մասին, ինչը նշանակում է, որ դրանց մեծ մասը դեռ մնում է ստվերում: Այս իրողության պատճառներից մեկն էլ այն է, որ բանակում դեռ չկա իրական հասարակական վերահսկողություն:

Ստորև ներկայացվողն ընդամենը հերթականն է այդպիսի գործերից, որն երևակում է իրականության սոսկ մի մասը, ինչպես ասում են, այսբերգի գագաթը: Քրեական գործի նախաքննությամբ պարզվել է, որ Կարեն Հարությունյանը հանդիսանալով թիվ Ն զորամասի պարենային ծառայության պետ, ծառայության նկատմամբ դրսևորել է անփույթ վերաբերմունք, որի հետևանքով պետությանը պատճառվել է էական վնաս:

Բացի վերը նշվածից, նա հանդիսանալով պաշտոնատար անձ, ըստ մեղադրական եզրակացության, անձնական այլ շահագրգռվածությունից ելնելով, անցել է իր լիազորությունների սահմանը, պաշտոնական փաստաթղթեր հանդիսացող պարենային պահեստի սննդամթերքի հաշվառման մատյանում մտցրել է ակնհայտ կեղծ թվական գրառումներ:

Նույն քր. գործի շրջանակում մեղադրանք է առաջադրվել նաև Արթուր Արշակյանին: նախաքննությամբ պարզվել է, որ հանդիսանալով թիվ Ն զորամասի զինծառայող, օժանդակել է իր նկատմամբ պետ հանդիսացող Կարեն Հարությունյանին:
Վերը նշված արարքների համար Կարեն Հարությունյանին մեղադրանք է առաջադրվել ՀՀ քրեական օրենսգրքի 375-րդ հոդվածի 1-ին մասի, 376-րդ հոդվածի 1-ին մասի, 314-րդ հոդվածի 1-ին մասի, իսկ Արթուր Արշակյանին' 321-րդ հոդվածի 1-ին մասի և 38-375-րդ հոդվածի 1-ին մասի հատկանիշներով:

Ա. Հովհաննիսյան