«Մաղարիչ»` Հովիկ Աբրահամյանին…

Հայաստանում բիզնեսի համար արհեստականորեն ստեղծված խոչընդոտների, գործարար մարդկանց առաջ շատ հաճախ ծառացող պրոբլեմների ու անլուծելի թվացող իրավիճակների մասին գիտի, թերևս, յուրաքանչյուր ոք: Ասում են' նոր Հարկային օրենսգիրքը եկել է միայն բարդացնելու այն' արդեն իսկ ծայրահեղ վատ վիճակը, որ առկա է երկրի բիզնես դաշտում: Ոմանք նույնիսկ պնդում են, թե սա դրսի ծրագիր է, որ նպատակ ունի կարճ ժամանակահատվածում դատարկել երկիրը հայերից' այն վերածելով որևիցե ապագա չունեցող ու դեմոգրաֆիական պրոբլեմների ծովում անհույս խեղդվող երկրի:

Պարզվում է, սակայն, որ ամեն բան այնքան էլ ողբերգական չէ, ինչպես կարող է թվալ առաջին հայացքից. այն բիզնեսմեններն, ովքեր բարիդրացիական հարաբերությունների մեջ են գտնվում ասենք նույն վարչապետ Հովիկ Աբրահամյանի հետ ու կարողանում են հասկանալ այն լեզուն, որով փորձում է իրենց հետ խոսել կառավարությունը, կարող են ոչ միայն չանհանգստանալ սեփական ապագայի համար, այլև կառուցել պլաններ, մշակել զարգացման ծրագրեր ու վստահ լինել' իրենց «հավին քշա ասող» չի լինի:

Ինչպես պարզ է դառնում ԶԼՄ-ներում տեղ գտած տեղեկություններից, ՀՀ կառավարության 2015-ի դեկտեմբերի նիստում ընդունած որոշմամբ` մինչև երեք տարով հետաձգվել է ներդրումային ծրագրի շրջանակում «Ջերմուկ Գրուպ» ՓԲԸ-ի կողմից ապրանքների ներմուծման դեպքում մաքսային մարմինների կողմից հաշվարկված ավելացված արժեքի հարկի գումարների վճարման ժամկետը: Նշենք, որ «Ջերմուկ Գրուպ»-ը նախատեսում է Ջերմուկում կառուցել ամբողջովին նոր գործարան' հագեցնելով այն ժամանակակից սարքավորումներով:

Այս ողջ պատմության մեջ ամենաուշագրավը, սակայն, մեկ այլ իրողություն է, որ կցանկանայինք' ուշադրություն դարձնեիք. Հովիկ Աբրահամյանին, այս ամենի հետ կապված, Աշոտ Արսենյանը նվեր է մատուցել. Աբրահամյանին է նվիրել սեփական գործարանի մոտ գտնվող, «Ջերմուկ Գրուպ» ՓԲԸ-ին պատկանող, կիսակառույց շինություն: Ասում են' այստեղ Աբրահամյանը պլանավորում է «ղայդին» հյուրանոց կառուցել' ամրապնդելով սեփական դիրքերը հյուրանոցային բիզնեսում:

Դե ինչ, փաստորեն' կարելի է ասել, Հայաստանում բիզնես հաջողության բանալին վերջապես գտնված է. ով ցանկանում է ստանալ ՀՀ կառավարության աջակցությունն ու արժանանալ հարկային մարմինների բարի վերաբերմունքին, պետք է մտածի, թե ինչպես կարողանա հաճոյանալ կառավարության ղեկավարին:

Սարկազմը' սարկազմ, բայց այն, որ այս ամենը խոսում է մեր երկրի կառավարման ոլորտում արմատացած պախարակելի երևույթների ծայրաստիճան սրման մասին, փաստ է: Հետո էլ ոմանք խոսում են երկրում կոռուպցիայի դեմ պայքարի մասին այն պարագայում, երբ, ինչպես հայտնի է, կոռուպցիան սկսում է համապատասխաններին հենց նմանատիպ թանկանոց նվերներ մատուցելով: Կոռուպցիայի դեմ պայքարող մարմինը, փաստացի, ինքն է ծնում կոռուպցիա, մի բան, որն արդեն տասնամյակներ ի վեր բնութագրական է մեր երկրին:

Դավիթ ԲԱԲԱՆՈՎ