Գիտափորձի ժամանակ երկնքում ամպերից մուգ կարմիր ձագար է գոյացել, և ոմանք տագնապել են, որ արդեն բացվում են զուգահեռ աշխարհի դարպասները (լուսանկարներ)

Միջուկային հետազոտությունների եվրոպական կենտրոնի (CERN) բարձր էներգիաների ֆիզիկայի լաբորատորիայում մեծ հադրոնային կոլայդերով (բախիչով) փորձի ժամանակ տեղի բնակիչներն ականատես են եղել բնության անսովոր երևույթի:

Հաղորդվում է, որ հունիսի 24-ին գիտափորձի անցկացման ժամանակ Շվեյցարիայում գտնվող CERN-ի շենքի վերևում երկինքը սկսել է փոխել իր գույնը, դարձել է մուգ կարմիր, և հենց լաբորատորիայի մոտ ամպերից ձևավորվել է ձագար, ինչպես պտտահողմերի առաջացման ժամանակ է լինում: Ֆանտաստիկայի սիրահարները հայտարարել են, որ կոլայդերը կարող է բացել «զուգահեռ աշխարհի պորտալը» (դեպի մեծ տարածություն տանող դարպասները) կամ տարածաժամանակային այլ չափում: Այս մասին գրել է «The Sun»-ը: Սակայն, գիտնականները հանգստացրել են հասարակությանը: Նրանք բացատրել են, որ հետազոտությունների ընթացքում փորձել են մի տեղ հավաքել միկրոմասնիկները, ինչը և հանգեցրել է բնության այդ անսովոր երևույթին:

Ըստ «Վիքիպեդիա» ազատ հանրագիտարանի՝ մեծ հադրոնային բախիչը (ՄՀԲ) (անգլերեն՝ Large Hadron Collider (LHC)) աշխարհի ամենամեծ և ամենաբարձր էներգիայով մասնիկների արագացուցիչն է: Հադրոն նշանակում է քվարկներից բաղկացած մասնիկ։ Հիշյալ արագացուցիչը ստեղծվել է երկու հակառակ լիցքավորված մասնիկների փնջերն իրար բախելու նպատակով։

Մասնիկները կամ 574 ՏէՎ էներգիայով կապարի միջուկներ են, կամ 7 ՏէՎ (տեռա-էլեկտրոն-Վոլտ) էներգիայով պրոտոններ։ Բախիչը նախատեսված է պատասխանելու ֆիզիկայի ամենահիմնական հարցերին: Ակնկալվում է, որ կօգնի հասկանալ բնության ամենախորքային օրենքները։ ՄՀԲ-ն գտնվում է 27 կմ շրջանագծով մի թունելում, Ֆրանսաշվեյցարական սահմանի ներքո, Շվեյցարիայի Ժնև քաղաքի մոտ։

Մեծ հադրոնային բախիչը կառուցվել է Միջուկային Հետազոտությունների Եվրոպական Կենտրոնի միջոցով՝ բարձր էներգիաների ֆիզիկայի տարբեր կանխագուշակումները, այդ թվում նաև այն ժամանակ ենթադրյալ Հիգգսի բոզոնի գոյությունը ստուգելու համար։ Հիգգսի բոզոնը հայտնաբերվել է 2012 թ.։

Լուսանկարներում' ամպերից տարօրինակ ձագարը՝ Ժնևում գտնվող լճի վրա: