Նվաստացած քաղաքացին՝ մեր վասալության դրսևորում

Հույս ունեմ, որ այն պահին, երբ թողարկված կլինի այս նյութը, Վերին Լարսում մնացած 50-ից ավելի մեր հայրենակիցներ արդեն հայրենիքում կլինեն:

Մեր հայրենակիցները 11 օր շարունակ ապրել են վատ պայմաններում՝ առանց կանոնավոր սնունդի ու ջրի, պատշաճ վերաբերմունքի չեն արժանացել Ռուսաստանի միգրացիոն ծառայությունների ու իրավապահ մարմինների կողմից:  Վիճակն այնքան անմխիթար է եղել, որ Հայաստանի իշխանությունները, որոնք սովորաբար թթու խոսք չեն ասում Մոսկվայի հասցեին, հրապարակավ խոսեցին խնդրի մասին: Ռուսաստանի իր գործընկերոջը պաշտոնապես դիմել է Հայաստանի օմբուդսմեն Արման Թաթոյանը:

Ռուսաստանը փորձում է ամենուր պաշտպանել ոչ միայն իր քաղաքացիներին, այլ նաև հայրենակիցներին: Նրանք խնդիր ունեին Ղրիմում, այն միացրեց Ռուսաստանին: Մոսկվան համարեց, որ ռուսներին նեղում են Դոնեցկում և Լուգանսկում, ռուսական ուժերը միջամտեցին Ուկրաինայի ներքին գործերին:

Նույնիսկ  մարդասպան Վալերի Պերմյակովը իրավական առումով գտնվում է իր իշխանությունների, պետության պաշտպանության ներքո: Ֆորմալ առումով նա հանձնվել է Հայաստանի արդարադատությանը, բայց պահպանվում է ռուսների կողմից ու նույնիսկ դատվում է նրանց գծած սցենարով:

Եթե Վերին Լարսում Հայաստանի քաղաքացին մնում է առանց հացի ու ջրի, նվաստացվում է, ապա դա մեր երկրի նվաստացման, նրա թուլության ու խեղճության դրսևորումն է: Ռուս իրավապահի ոտնձգությունը Լարսում հայտնված անօգնական հայաստանցու դեմ հայ ռուսական վասալային հարաբերությունների մինի մոդելն է, տեղայնացումը: 

Ի դեպ, Ռուսաստանի իշխանությունները սկսել են ծաղրել ոչ միայն շարքային հայաստանցուն: Ես չգիտեմ՝ իրո՞ք ՌԴ ԱԳ ներկայացուցիչ Մարիա Զախարովան նացիզմի հերոսացման փորձ է անվանել Երևանում Գարեգին Նժդեհի արձանի տեղադրման ցանկությունը, թե իսկապես խեղաթյուրվել են նրա խոսքերը, սակայն միայն այն հանգամանքը, որ Ռուսաստանի չինովնիկն իրեն իրավունք է վերապահում անդրադառնալ Երևանում տեղադրվելիք արձանի խնդրին, վիճակն արդեն տխուր ու զավեշտալի է դարձնում: Նժդեհի գաղափարախոսությունը պաշտոնապես որդեգրված է Սերժ Սարգսյանի ՀՀԿ-ի կողմից ու չի բացառվում, որ մի օր «նացիստներ» կորակվեն Հայաստանի իշխանությունները, եթե որոշեն շեղվել «ռուսական կուրսից»:

Հայ-ռուսական հարաբերությունները վերանայման անհրաժեշտություն ունեն: Ռուսաստանը մեր տարածաշրջանի հիմնական դերակատարն է: Այս հանգամանքի անտեսումը քաղաքական անգրագիտություն կլինի: Մյուս կողմից հայ-ռուսական հարաբերությունները բարեկամական ու գործընկերային պետք է լինեն, այլապես դրանց այսօրվա վասալային բնույթը սպանում է Հայաստանի ինքնիշխանությունն ու Լարսում անօգնական մնացած հայաստանցու արժանապատվությունը:

Սարգիս Հակոբյան