Իրոք ճզմեցինք մրցակցին. Աբրահամ Խաշմանյան

Ցավում եմ միայն, որ խաղը պետք է վերջանար 6:0, այլ ոչ թե 3:0 հաշվով: ԼՈւՐԵՐ.com-ի թղթակցի փոխանցմամբ՝ այս մասին լրագրողների հետ զրույցում, Չեմպիոնների լիգայի որակավորման փուլի առաջին տուրի «Ալաշկերտ»-«Սանտա Կոլոմա» պատասխան խաղից հետո, ասաց «Ալաշկերտի» գլխավոր մարզիչ Աբրահամ Խաշմանյանը:

«Երևի բոլորն էլ տեսան, որ հակառակորդ թիմի խաղացողներն առաջին րոպեներից խոտածածկին պառկած էին, նորից բողոքում էին մրցավարին: Բայց ես ասել էի, որ այս խաղին պատրաստ ենք լինելու և պատրաստ էինք: Խաղը բարդ էր: Մեր խաղացողն անկարգապահ գտնվեց և թիմին թողեց տասը հոգով: Բայց սա ֆուտբոլ է: 10 հոգով մնալուց հետո էլ մենք կարողացանք կազմակերպված լինել: Մրցակցին չթողեցինք մեկ խաղացողի առավելությունն օգտագործի: Երբ մրցակիցը մնաց տասը հոգով, մենք ստացանք բացահայտ առավելություն: Ցավում եմ միայն, որ խաղը պետք է վերջանար 6:0, այլ ոչ թե 3:0, որ ամեն ինչ հանգիստ լիներ, չնայած մրցակիցը չէր կարող իրեն նորմալ դրսևորել: Նրանք իրենց շատ տգեղ պահեցին և տգեղ են խաղում»:

Անդրադառնալով հակառակորդի մարզչի այն հայտարարությանը, որ լարվածության պատճառը Խաշմանյանի՝ «ճզմելու ենք մրցակցին» հայտարարությունն էր՝ Խաշմանյանն ասաց.

«Հակառակորդի մարզիչը շատ նուրբ է, դա Եվրոպան է, և նորմալ է: Բայց ես նրան ո՛չ վիրավորել եմ, ո՛չ էլ հայհոյել: Ասել եմ, որ ճզմելու ենք, այսինքն՝ դիմելու ենք պրեսինգի: Ինչպես խաղը ցույց տվեց, մենք իրոք նրանց ճզմեցինք»: 

Մինասյանի կարմիր քարտին անդրադառնալով՝ մարզիչն ասաց.

«Նորայր Գյոզալյանը շատ լավ ֆուտբոլ խաղաց: Մենք ունենք հավասարազոր խաղացողներ: Ամեն ինչ կանենք, որ շատ կազմակերպված լինենք: Միհրանը միանշանակ սխալ է և պատժվելու է: Բայց սա ֆուտբոլ է և էմոցիաների խաղ է: Իսկ Միհրանը մեզ համար առանցքային խաղացող է»:

Այն նկատառմանը, որ «Սանտա Կոլոմայի» մարզիչն ասել էր, թե մեր ֆուտբոլիստը մրցավարի հետ ծաղրել է իրենց՝ Խաշմանյանն ասաց. «3:0 հաշվի ժամանակ նրանք մեզ փորձում էին խփել, կեղտոտ ֆուտբոլ էին խաղում: Արթուր Եդիգարյանին խփեցին, նա չպատասխանեց, բայց ցույց տվեց 3:0 հաշիվը: Իմ ֆուտբոլիստները շատ կրթված ու շատ դաստիարակված են»:

Խոսելով երկրպագուների մասին՝ մարզիչը հավելեց. «Երկրպագուների գործոնը կարևոր է, և ուրախ եմ, որ այսօր շատ մարդ կար մարզադաշտում: Ֆուտբոլիստն զգում է, որ երկրպագուն իր հետ է: «Ալաշկերտն» այսօր «Ալաշկերտ» է, դրա համար երկրպագուներն էլ են գալիս: Մենք արեցինք այն, ինչը քչերին է հաջողվել: Պատմություն ենք կերտում»: