«Արմենալ»-ի արտադրանքն ու պետբյուջե վճարած գումարներն ավելացել են

Երևանի փայլաթիթեղագլանման «Արմենալ» գործարանը, որը մտնում է աշխարհում ալյումինի և կավահողի խոշորագույն արտադրող «Ռուսալ» Միացյալ ընկերության կազմի մեջ, 2012-ի առաջին եռամսյակում 6020 տոննա արտադրանք է ունեցել, ինչը 2 տոկոսով ավել է ծրագրված ցուցանիշից։ 

Հայաստանի Պետեկամուտների կոմիտեի տվյալներով` հունվար-մարտ ամիսների ընթացքում երկրից արտահանվել է 5897 տոննա արտադրանք, ինչը 0,5%-ով (30 տոննա) գերազանցում է նախորդ տարվա տվյալ ժամանակահատվածի ցուցանիշը։ 

Հաշվետու ժամանակաշրջանի ընթացքում գործարանը պետբյուջե է վճարել 299,2 մլն դրամ, ինչը համարյա 40%-ով գերազանցում է նախորդ տարվա նույն ժամանակահատվածի ցուցանիշը։ Այդ մասին ասված է ընկերության տարածած հաղորդագրությունում։

Հիշեցնենք, որ «Արմենալ»-ը ստեղծվել է Երևանում 2000-ի մայիսին, Քանաքեռի ալյումինի գործարանի հիմքի վրա։ Այն Հայաստանի խոշորագույն արտադրական ձեռնարկություններից է, Կովկասում և Կենտրոնական Ասիայում փայլաթիթեղի միակ արտադրողը: «Սայանալ», «Ուրալսկայա ֆոլգա» և «Սայանսկայա ֆոլգա» գործարանների հետ կազմում է «Ռուսալ» ընկերության փաթեթավորման դիվիզիոնը, որի գլխավոր տնօրենն է Օլեգ Դերիպասկան։