Կդառնա՞ Վանաձորը «Լուսավոր»

Հոկտեմբերի 2-ին ՏԻՄ ընտրություններ են նաև Վանաձորում: Երևանի և Գյումրիի օրինակով դրանք անցկացվելու են բացառապես համամասնական ընտրակարգով: Ձևավորված ավագանին ընտրելու է քաղաքապետ:

Իշխանությունները հանրապետության երրորդ քաղաքում շատ ավելի կայուն մարտավարություն են որդեգրել, գործող սկանդալային քաղաքապետը ՀՀԿ համամասնական ցուցակում չկա: Այն ղեկավարելու է ըստ այդմ իշխող կուսակցության քաղաքապետի թեկնածու, նորելուկ կուսակցական Մարկոս Ասլանյանը, ով նախկինում նոտար է աշխատել:

Բնականաբար, նա ավելի անկաշկանդ է և իրեն նույնիսկ կարող է թույլ տալ քննադատել գործող քաղաքապետին, քաղաքային իշխանություններին, նրանց քաղաքականությունը, միաժամանակ վայելելով հանրապետության իշխանությունների աջակցությունը:

Վերջիներս վանաձորցիներին ներկայանում են նոր դեմքով՝ հույս ունենալով իրենց կողմը գրավել բողոքական ընտրազանգվածի մի մասին: Վանաձորի ընտրություններն այլ առանձնահատկություն էլ ունեն: Այստեղ իշխանության հիմնական մրցակիցը լինելու է ոչ թե այսօրվա տիտղոսակիր ընդդիմության, այլ նոր քաղաքական ուժի ներկայացուցիչ: Այդ նոր ուժի՝ «Լուսավոր Հայաստան» կուսակցության ղեկավարը, Վանաձորից մեծամասնական ընտրակարգով ընտված Էդմոն Մարուքյանն է:

Նրա կուսակցության ցուցակը Վանաձորում կղեկավարի հարազատ եղբայրը՝ Քրիստ Մարուքյանը: «Լուսավոր Հայաստան» կուսակցությունում թերևս հույս ունեն կրկնել 2012-ի խորհրդարանական ընտրությունների ֆենոմենը, երբ համեմատաբար անհայտ Էդմոն Մարուքյանը հաղթեց հայտնի Վիկտոր Դալլաքյանին: Մարուքյանների կողմնակիցները ասում են նաև, որ վերջին ընտրություններում ՀՀԿ-ն Վանաձորում ստացել է 30 տոկոսից ոչ ավել քվե: Այստեղ տեղին է հիշեցնել, որ տեղական ընտրություններն անկախ ընտրակարգից ունեն տեղային առանձնահատկություններ և տարբերվում են առավել քաղաքականացված համապետական ընտրություններից:

Բացի այդ, անցած տարիներին արտագաղթի տեմպերը չեն թուլացել, վիճակագրությունը ցույց է տալիս, որ գնացողների ստվար հատվածը հենց բողոքական զանգվածն է: Նույնիսկ արտաքուստ նկատելի է, որ արտագաղթի հետևանքով մեր հասարակության սոցիալական կառուցվածքը փոխվել է: Անկեղծ ասած, ընտրական գործընթացը իշխանության համար ավելի վերահսկելի է դարձել:

Վանաձորի քաղաքային ընտրություններում իշխանությունը կմոբիլիզացնի բավարար ֆինանսական, վարչական ռեսուրսներ, ինչին «Լուսավոր Հայաստանը» պետք է կարողանա դիմակայել իր քաղաքական, կազմակերպչական պոտենցիալով: Մեկ այլ նորաստեղծ քաղաքական ուժի «Քաղաքացիական պայմանագիր» կուսակցության համար ինդիկատորային էին Հրազդանում կայացած ընտրությունները:

Այդ քաղաքական ուժը Հրազդանում ուներ ամուր հիմքեր. քաղաքապետի ընտրություններում կենտրոնացրել էր իր ողջ ներուժը: Նիկոլ Փաշինյանի խոսքերով՝ տեղամասերում եղան նորմալ ընտրություններ, սակայն հայտնի հրամանատար Սասուն Միքայելյանը պարտվեց իշխանության թեկնածու, գործող քաղաքապետին:

Վանաձորի ընտրություններում շատ հնարավոր է կրկնվի հենց այս սցենարը:

Բայց շնորհիվ նոր ընտրակարգի՝ «Լուսավոր Հայաստան» կուսակցությունը Վանաձորի ավագանիում կունենա սեփական խմբակցությունը:

Վանաձորի քաղաքային ընտրությունների դրականն այն է, որ իշխանություն-ընդդիմություն սխեմատիկ ու ձանձրալի դարձած պայքարին փոխարինում են նոր դեմքեր, նոր մոտեցումներ:

Սարգիս Հակոբյան