«Ճանապարհ դեպի Ռիո». Աթլետ Գոռ Ներկարարյան (տեսանյութ, լուսանկարներ)

Հայաստանի ազգային օլիմպիական կոմիտեի պաշտոնական կայքը «Ճանապարհ դեպի Ռիո» նախագծում ներկայացնում է Օլիմպիական խաղերում Հայաստանը ներկայացնող մարզիկներին և նրանց օլիմպիական լուսանկարները, որոնք արվել են լուսանկարիչ Հակոբ Բերբերյանի կողմից՝ հատուկ «Ճանապարհ դեպի Ռիո» նախագծի համար:

Մեր նախագծի հաջորդ մարզիկն աթլետ Գոռ Ներկարարյանն է (հեռացատկ), ով Օլիմպիական խաղերի ուղեգիր նվաճեց Ուկրաինայում կայացած վարկանիշային մրցաշարում: Նա ծնվել է 1993 թվականին Վանաձոր քաղաքում: Աթլետիկայով զբաղվում է 13 տարեկանից: Մինչ աթլետիկայով զբաղվելը՝ Գոռը հասցրել է իր ուժերը փորձել նաև ֆուտբոլում և մարմնամարզությունում:

Նա Բրազիլիայում ապրելու փորձ ունի, քանի որ մոտ 1,5 տարի ապրել և մարզվել է այնտեղ: Իր խոսքով՝ արդեն ծանոթ է բրազիլացիների «նիստ ու կացին», Ռիոյին և գիտի, որ բրազիլացիների շարքերում կգտնվեր մարդիկ, ովքեր կերկրպագեն հայ մարզիկներին:

-Խաղերին ի՞նչ թալիսման ես հետդ տանելու:

-Նման բաների լուրջ չեմ վերաբերվում:

-Ու՞մ կուզեիր կողքիդ կամ հանդիսատեսի շարքում տեսնել:

-Առաջին հերթին ծնողներիս, բայց նրանց ներկայությունը գուցե ավելի կմեծացնի լարվածությունը:

-Նկարագրիր Օլիմպիական խաղերը՝ երեք բառով:

-Պայքար, ուժեղագույնների մրցակցություն և լավագույնի ձգտում:

-Ո՞ւմ հետ ես առաջինը կիսելու հաջողությունդ:

-Հայ և բրազիլացի մարզիչներիս հետ:

-Ինչպե՞ս կուզես, որ հիշվեն այս Օլիմպիական խաղերը:

-Լավ արդյունքով: