Կնամոլ, կողոպտիչ պաշտոնյան

Բազմաթիվ մարդիկ բանտերում ամիսներ, տարիներ են մաշեցնում ձու գողանալու համար: Այսպիսին է Հայաստանի արդարադատության դրվածքը: Տեր չունեցող մարդիկ կարիքից, սոցիալական վիճակից դրդված կարող են հանցագործություն կատարել` դրա համար շատ թանկ գին վճարելով: Տեր ունեցողները կարող են թքած ունենալ արդարդատության և օրենքի վրա` կատարելով անհամեմատ ծանր հանցագործություններ: Տասնյակ օրինակներ կարող եմ բերել, սակայն սահմանափակվեմ միայն մեկով: Մի երիտասարդի գիտեմ, ով ազատազրկվել է 7-8 տարով, որովհետև ինքնապաշտպանական նպատակով նրա հասցրած մեկ ապտակը դիմացինին հասցրել է մահվան: Գիտեմ նաև երկրորդ նախագահի թիկնապահին, ով տարիներ առաջ Արագած սրճարանում մարդ սպանեց` մեկ օր անգամ չանցկացնելով անազատության մեջ: 

Սակայն գամ բուն թեմային, թերթերից մեկում արտառոց դեպքի մասին կարդացի: Մեր պաշտոնյաններից մեկը մի կնոջ հետ սեռական հարաբերության մեջ է մտել` նրա պարանոցից կողոպտելով թանկարժեք զարդ: Զարմացա, երբ իմացա, որ ՀՔԾ-ն լուրը ոչ միայն հաստատել է, այլ հարուցել է քրեական գործ, ընթանում է նախաքննություն: Մեր իշխանության ներկայացուցիչների բարոյական նկարագրի մասին երբեք բարձր կարծիքի չեմ եղել: Մեր իշխանավորներն ընտրակեղծարար են, կաշառակեր, իրենց թույլ են տալիս գրպանել թոշակառուի, մանկավարժի փողը, մի խոսքով` մասնավոր ու պետական փողերի հետ վարվում են այնպես, ինչպես քեֆները փչում է: Ընդ որում, ասվածը վերաբերում է ոչ միայն պաշտոնյաններին, այլև նրանց մերձավորներին: Սակայն, նշված դեպքն արտառոց է, նույնիսկ այս տխուր համապատկերում: Մեր իրականության մեջ տղամարդիկ են կանանց վճարում, որպեսզի այլ մարդիկ չիմանան իրենց արտաամուսնական հարաբերությունների մասին: Այս պատմության հերոս պաշտոնյան այնքան վստահ է եղել իր հնարավորությունների ու կապերի վրա, այնքան թքած է ունեցել իր վերադասի հնարավոր հանդիմանության, օրենքի վրա, որ օրը ցերեկով կողոպտել է կնոջ` չվախենալով քրեական հնարավոր հետապնդումից, նաև սկանդալից, որի հետևանքով հանրության սեփականությունը կդառնան իր ինտիմ հարաբերությունները: 

Մեր իշխանության բնույթն այնպիսին է, որ դրանում ներկայացված մարդիկ իրենց ամենազոր ու ամենակարող են պատկերացնում: Նշված պաշտոնյան թերևս վստահ է եղել, որ ինքն անպատիժ է մնալու, հուսանք ընդունված ավանդույթն այս անգամ գոնե կխախտվի: Պաշտոնյան, որի անունը առայժմ չի հրապարակվում ոչ միայն պետք է հեռացվի աշխատանքից, այլ` քրեորեն պատժվի: Անհրաժեշտ է կոտրել այն կարծրատիպը, որ տերովին ամեն բան կարելի է, անտերն անպաշտպան ու անօգնական է:

Սարգիս Հակոբյան