Մի մուննաթ, մի սուննաթ…

Այն, որ Հայաստանում պետական պաշտոնը վաղուց վերածվել է բացառապես տեղի չինովնիկների բարեկեցությանը ծառայեցվող, նրանց անձնական ամբիցիաները բավարարող մերկ գործիքի, բոլորովին էլ նորություն չէ. մեզանում մատների վրա կարելի է հաշվել այն պաշտոնյաներին, որոնք սեփական աշխատանքին վերաբերվում են փոքրիշատե պատասխանատու կերպով ու հանդիսանում իրենց ոլորտների իսկական գիտակներ:

Ցավոք, ինչպես կարելի է ենթադրել ԱԺ ՀՀԿ խմբակցության պատգամավոր, Ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանի պահվածքից, վերջինիս որևիցե կերպ չի կարելի դասել կոմպետենտների թվին, ինչը, գոնե Մինասյանի համար, չի կարող մտահոգիչ չլինել:

Պարզվում է՝ լրագրողի այն հարցին՝ ո՞րն է ապստամբության պատճառը և հանգուցալուծումը, Մինասյանը «մուննաթով» պատասխանել է, թե ինֆորմացիայի չի տիրապետում և այդ պատճառով չի կարող սույն հարցին պատասխանել. Երևանում չէ:

Փաստորեն՝ մինչ երկիրը խորը ցնցումների մեջ է, մինչ հայաստանյան հասարակությունն աննախադեպ տվայտանքների մեջ է ընկել, պարզվում է՝ ԱԺ-ում ոմանք զբաղված են ամառային հանգիստ կազմակերպելով ու կյանքի գեղեցիկ ակնթարթները վայելելով՝ մոռանալով, որ իրենք ամենևին էլ ազատ գրաֆիկով աշխատող տաքսիստներ չեն ու ի սկզբանե պարտավոր են ոչ միայն տիրապետել երկրում ստեղծված իրավիճակին, այլև ֆիզիկապես ներկա գտնվել քաղաքում, քանի որ դա է պահանջում կարգը, ժամի հրամայականը:

Մինչդեռ Մինասյանը, որը բավական պատասխանատու պաշտոն է զբաղեցնում երկրում, անգամ չգիտի էլ՝ ինչ է կատարվում Երևանում: Տեսնես՝ այսքանից հետո ի՞նչ երեսով է արձակուրդից վերադառնալու ու կրկին ըմբոշխնելու յուր պաշտոնի ընձեռած քաղցր պտուղները…

Ցավոք, այս ամենը ևս մեկ անգամ ի ցույց է դնում այն անհերքելի իրողությունը, որ Հայաստանի Հանրապետությունը դեռևս լիարժեքորեն կայացած չէ, դեռևս շատերի կողմից լիովին չգիտակցված է մնում պետական պաշտոնյա լինելու արժեքն ու նշանակությունը, ինչը, համաձայնե՛ք, չի կարող անհանգստացնող հանգամանք չլինել. մինասյանատիպ չինովնիկների հետ պետությանդ կայացման գործնը երբեք գլուխ չես բերի:

Դավիթ ԲԱԲԱՆՈՎ