Իրավիճակը Խորենացի փողոցում (ուղիղ միացում)

02:05

Այս պահի դրությամբ Խորենացի փողոցում իրավիճակը չի փոխվել՝ այնտեղ են և՛ ցուցարարները, և՛ ոստիկանները:

00:37

Այս պահի դրությամբ իրավիճակը Խորենացի փողոցում համեմատաբար հանգիստ է, կան մեծ քանակությամբ ոստիկաններ և ցուցարարներ, որոնք պահանջում են հարցի խաղաղ լուծում:

23:10

Իրավապահ ուժերը մեծաքանակ պատ են կազմում այս պահին Խորենացի փողոցի լայնքով: Հստակ ոչ մի բան պարզ չէ: Իրավապահ ուժերը գնալով շատանում են:

22:40

Ընդդիմադիր պատգամավոր Նիկոլ Փաշինյանը լրագրողներին փոխանցեց, որ իրեն այսօր հաջողվել է տեսնել «Վարդաշեն» քրեակատարողական հիմնարկում գտնվող «Հիմնադիր խորհրդարան»-ի առաջնորդ Ժիրայր Սեֆիլյանին, սակայն նրան թույլ չեն տվել զրուցել Սեֆիլյանի հետ: ՔԿՀ-ում նրան կրկին չեն բացատրել՝ ինչու չի կարող խոսել Սեֆիլյանի հետ:

Փաշինյանի կարծիքով, Սեֆիլյանը ակնհայտ ինֆորմացիոն բլոկադայի մեջ է և չի տիրապետում տեղեկությունների, և կարելի է ենթադրել, որ նա հեռու է բանակցություններից:

«Լիարժեք բանակցությունների մեջ լինելու համար պետք է ինֆորմացիայի տիրապետել: Եթե նա ինֆորմացիայի չի տիրապետում, ինչպե՞ս կարող է գնահատել իրավիճակը», - ասաց Փաշինյանը:

Հիշեցնենք, ՊՊԾ գունդը գրաված «Սասնա Ծռեր» խմբի անդամները պահանջում են, ազատ արձակել Ժիրայր Սեֆիլյանին: Ոստիկանությունը հայտարարում է, որ բանակցում է նրանց հետ: Փաշինյանի պնդմամբ, սա քաղաքական լուծում պահանջող իրավիճակ է:

Նիկոլ Փաշինյանին հաջողվել է հանդիպել «Վարդաշեն» ՔԿՀ-ում գտնվող «Նոյեմբերի 5»-ի գործով դատապարտված Շանթ Հարությունյանի և Վարդան Վարդանյանի հետ: Պատգամավորը փոխանցեց, որ նրանք իրենց լիարժեք զորակցությունն են հայտնել «Սասնա Ծռեր» խմբի անդամներին:

«Նրանք համարում են, որ տեղի ունեցածը ոչ թե պատճառ է, այլ հետևանք Հայաստանում տեղի ունեցող ապօրինությունների», - ասաց Փաշինյանը:

Պատգամավորի փոխանցմամբ, Շանթ Հարությունյանը շեշտել է, որ «Սասնա Ծռեր»-ում գտնվում են առնվազն երկու հոգի, ում հարազատները նախկինում քաղաքական կամ քաղաքական մոտիվացիա ունեցող գործերով դատապարտվել են: Նրանք են Արեգ Կյուրեղյանը՝ դատարանի բակում օդամղիչ ատրճանակով կրակոցներ արձակելու համար 9 տարվա ազատազրկման դատապարտված Հայկ Կյուրեղյանի եղբայրը և «Նոյեմբերի 5»-ի գործով 5 տարվա ազատազրկման դատապարտված Լիպարիտ Պետրոսյանի եղբայրը:

22.25

Ակտիվիստները փորձում են որոշում կայացնել, արդյոք արժե ընտրել 5 ներկայացուցիչ և գնալ Խորենացի փողոց` ճշտելու ոստիկանական տեխնիկայի շարժ իրականացվում է թե` ոչ: 

22.15

Երեւանի ոստիկանապետ Աշոտ Կարապետյանը քաղաքացիներին վստահեցնում է, որ Խորենացի փողոցում ոստիկանական զինտեխնիկայի շարժ չի կատարվում:

22.10

Ակցիայի ընթացքում հայտարարվեց, որ Խորենացի փողոցում ոստիկանությունը զրահատեխնիկայի շարժ է իրականացնում, քաղաքացիները որոշեցին երթը շարունակել դեպի Էրեբունի: Նրանք նախապես կհավաքվեն Ազատության հրապարակում երթի ուղին մշակելու համար:

21.50

Այս պահին Մաշտոցի պողոտայի երթևեկելի մասի մի հատվածը փակ է, քանի որ քաղաքացիների մեծ մասը նստել է գետնին` բողոքի ակցիան վերածելով նստացույցի:

21:45

Երթը շարունակվում է: Ցուցարարները պահանջում են ազատել քաղբանտարկյալներին:

20:59

Ցուցարարները քայլերթով Հյուսիսային պողոտայից գնում են դեպի Խորենացի փողոց:

«Մենք ցանկացած բռնությանը դեմ ենք, մենք փորձում էինք հանրային քննարկում կազմակերպել, որպեսզի ստեղծված իրավիճակի շուրջ բռնություն չգործադրվի»,- այս մասին Ազատության հրապարակում, լրագրողների հետ զրույցում ասաց ակտիվիստ Մաքսիմ Սարգսյանը:

Նրա խոսքով՝ մարդկանց կարծիքները լսելու և քննարկելու, հետագա քայլերը հստակեցնելու կարիք կա, որովհետև միայնակ հնարավոր չէ որևէ որոշում կայացնել, բոլորն էլ հասկանում են համախմբումն ինչի կարող է կարող է հանգեցնել:

«Խոստացել են բոլոր բերման ենթարկվածներին բաց թողնել, և այլևս չխոչընդոտել մեր քննարկմանը»,- ասաց ակտիվիստնը, չբացառելով, որ քաղաքացիները երթ կիրականացնեն:

20:00

Լարված իրավիճակը Ազատության հրապարակում շարունակվում է: Բերման ենթարկվածների մեջ են Դավիթ Սանասարյանը և պատգամավոր Նիկոլ Փաշինյանի որդին:

19:44

Բերման են ենթարկվել մի քանի ցուցարարներ: Ցուցարարների հետ բանակցության է եկել ՀՀ ոստիկանության պետի առաջին տեղակալ, գեներալ-լեյտենանտ Հունան Պողոսյանը:

19:34

Լարված իրավիճակ Ազատության հրապարակում: Բախում է սկսվել ցուցարարների և ոստիկանության միջև:

19:24

Մեկնարկել է «Ոչ թալանին» նախաձեռնության կազմակերպած հանրային քննարկումը, որի ընթացքում որոշում էր կայացվել երթ անել դեպի Էրեբունի՝ աջակցություն հայտնելու հուլիսի 17-ին վաղ առավոտյան ոստիկանության ՊՊԾ գունդը գրաված խմբին:

Հիշեցնենք, որ հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց' պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: