ՀՀ Նախագահի հրամանագրով պարգևատրվել են Ռիոյի Օլիմպիական խաղերի մեդալակիր մարզիկները

ՀՀ Նախագահ Սերժ Սարգսյանը պարգևատրել է Ռիոյի օլիմպիական խաղերում մեդալներ նվաճած հայ մարզիկներին: Ռիո դե Ժանեյրոյում կայացած Օլիմպիական 31-րդ ամառային խաղերում տարած փայլուն հաղթանակի և Հայաստանն աշխարհին ըստ արժանավույն ներկայացնելու համար հունահռոմեական ոճի ըմբիշ Արթուր Ալեքսանյանը պարգևատրվեց «Հայրենիքին մատուցած ծառայությունների համար առաջին աստիճանի մեդալով:

Ռիոյում կայացած Օլիմպիական 31-րդ ամառային խաղերում փայլուն մրցելույթի և Հայաստանն աշխարհին ըստ արժանավույն ներկայացնելու համար հունահռոմեական ոճի ըմբիշ Միհրան Հարությունյանը պարգևատրվել է «Հայրենիքին մատուցած ծառայությունների համար» առաջին աստիճանի մեդալով:

31-րդ ամառային օլիմպիական խաղերում փայլուն մրցելույթի և հայրենիքի մարզական պատիվը բարձր պահելու համար ծանրորդ Սիմոն Մարտիրոսյանը պարգևատրվել է «Հայրենիքին մատուցած ծառայությունների համար» առաջին աստիճանի մեդալով: Ռիոյի ամառային օլիմպիական խաղերում փայլուն մրցելույթի և հայրենիքի մարզական պատիվը բարձր պահելու համար ծանրորդ Գոռ Մինասյանը պարգևատրվել է «Հայրենիքին մատուցած ծառայությունների համար» առաջին աստիճանի մեդալով:

ՀՀ Նախագահի հրմանագրերով պարգևատրվել են նաև ՀԱՕԿ նախագահ Գագիկ Ծառուկյանը, ՀԱՕԿ գլխավոր քարտուղար Հրաչյա Ռոստոմյանը, ինչպես նաև հայ օլիմպիականների մարզիչները:

Ֆիզիկական կուլտուրայի և սպորտի զարգացման գործում ներդրած մեծ ավանդի, Հայաստանի մարզական ոլորտին ցուցաբերած նշանակալի աջակցության համար Հայաստանի ազգային օլիմպիական կոմիտեի նախագահը պարգևատրվել է Պատվո շքանշանով: Ֆիզիկական կուլտուրայի և սպորտի զարգացման գործում ներդրած նշանակալի ավանդի համար Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանը պարգևատրվել է «Հայրենիքին մատուցած ծառայությունների համար» երկրորդ աստիճանի մեդալով: Ֆիզիկական կուլտուրայի և սպորտի բնագավառում ներդրած նշանակալի ավանդի հ ամար Հայաստանի Հանրապետության ըմբշամարտի ֆեդերացիայի նախագահի առաջին տեղակալ Հովհաննես Սոֆոյանը պարգևատրվել է «Հայրենիքին մատուցած ծառայությունների համար» երկրորդ աստիճանի մեդալով:

Ֆիզիկական կուլտուրայի և սպորտի բնագավառում ներդրած անձնական մեծ ավանդի և երկարամյա գործունեության համար հունահռոմեական ըմբշամարտի Հայաստանի ազգային հավաքականի գլխավոր մարզիչ Լևոն Ջուլֆալակյանը պարգևատրվել է «Հայրենիքին մատուցած ծառայությունների համար» երկրորդ աստիճանի մեդալով: Երախտագիտության մեդալով է պարգևատրվել Հայաստանի ծանրամարտի հավաքականի գլխավոր մարզիչ Փաշիկ Ալավերդյանը: Ֆիզիկական կուլտուրայի և սպորտի բնագավառում ներդրած անձնական մեծ ավանդի համար Գյումրիի՝ Արթուր Ալեքսանյանի անվան հունահռոմեական ոճի ըմբշամարտի մանկապատանեկան մարզադպրոցի տնօրեն Գևորգ Ալեքսանյանը պարգևատրվել է Մովսես Խորենացու մեդալով: Նորայր Մուշեղյանի անվան ըմբշամարտի օլիմպիական մանկապատանեկան մարզադպրոցի տնօրեն Սամվել Գևորգյանը պարգևատրվել է Մովսես Խորենացու մեդալով: Գյումրու ծանրամարտի մանկապատանեկան դպրոցի մարզիչ Հակոբ Փիլոսյանը պարգևատրվել է Երախտագիտության մեդալով: Ֆիզիկական կուլտուրայի և սպորտի զարգացման գործում ներդրած նշանակալի ավանդի համար Էջմիածնի քաղաքապետարանի թիվ 1 մարզադպրոցի ծանրամարտի մարզիչ Աշոտ Փիլոսյանը պարգևատրվել է Երախտագիտության մեդալով:

Պարգևատրման արարողությունից հետո իր ելույթում ՀՀ Նախագահը սրտանց շնորհավորեց ներկաներին Ռիոյի օլիմպիական խաղերում հայ մարզիկների ունեցած հաջողության համար: «Մենք շնորհակալ ենք, որ հեռավոր Բրազիլիայում դուք կարողացաք բարձր պահել մեր երկրի ու դրոշի պատիվը: Հատկապես շատ ուրախ եմ, որ 20-ամյա ընդմիոջումից հետո Հայաստան բերվեց օլիմպիական ոսկին: Համոզված եմ, որ ոչ միայն մենք, այլ նաև Արթուր Ալեքսանյանի մրցակիները, տեսան իրենց գերազանցող մարդու: Ոչ միայն մրցակիցները, այլ նաև մրցավարները, ոչ միայն մրցավարները, այլ նաև բոլոր երկրպագու ները: Շատ շնորհակալ ենք, Արթուր: Մենք Ռիո դե Ժանեյրոյում ականատես եղանք մեդալների, բայց մենք տեսանք նաև մեծ ներուժ, իսկ սա նշանակում է, որ հաջորդ օլիմպիադաներում մենք ունենալու ենք շատ ավելի մեծ հաջողություններ»,- ասաց ՀՀ Նախագահը:

Նա հավելեց, որ շատ կարևոր է, որ ավանդական մարզաձևերից զատ, արդեն հնարավորություն կա այլ մարզաձևերում ևս հաջողություններ արձանագրելու համար: «Բայց բացի մեդալներից, մենք տեսանք նաև անարդարություններ: Բայց ինչպես գիտեք, աշխարհը և մանավանդ մարզաշխարհը զերծ չէ անարդարություններից: Եվ անարդարությունների դեմ պայքարելու միակ ճանապարհը դա քրտնաջան աշխատանքն է, հաստատակամությունն է և համոզմունքը, որ հետագա փորձություններում հասնելու ենք հաջողության: Ես ոչ միայն համոզված եմ, որ գալիք աշխարհի և Եվրոպայի առաջնություններում Միհրանը կարող է հաջողությունների հասնել, այլ վստահ եմ, որ Տոկիոյի օլիմպիական խաղերում Միհրանը դառնալու է չեմպիոն: Միհրան ջան, պետք է շարունակել և ցույց տալ բոլորին, որ դու ունես կամային բարձր որակներ, սա շատ կարևոր է»,- ընդգծեց ՀՀ նախագահը՝ հավելելով, որ չի ցանկանում մեկ առ մեկ թվարկել բոլոր հայ օլիմպիականներին, որովհետև հայ ժողովրդի մեծ մասը նրանց բոլորին ճանաչում են:

Սերժ Սարգսյանը շնորհակալություն հայտնեց հայ օլիմպիականներին, ՀԱՕԿ-ի աշխատակազմին՝ նախագահ Գագիկ Ծառուկյանի գլխավորությամբ: Սերժ Սարգսյանը շնորհակալություն հայտնեց նաև բոլոր մարզաձևերի ֆեդերացիաների նախագահներին, բոլոր նրանց, ովքեր աջակցում են սպորտին, ովքեր սեփական միջոցներից հնարավորություն են ստեղծում մարզիկների համար ոչ միայն նորմալ մարզվել, այլ արժանապատիվ ապրել: ՀՀ Նախագահը առանձնակի շնորհակալություն հայտնեց հայ մարզիկների ծնողներին՝ հերոսների ծնել և դաստիարակելու համար: