Արդյոք ՀՀԿ-ին խանգարում էին Գագիկ Խաչատրյանը, Գագիկ Բեգլարյանն ու մյուսները

Ինչպես Վազգեն Սարգսյանի, Արամ Սարգսյանի, Անդրանիկ Մարգարյանի, Տիգրան Սարգսյանի և Հովիկ Աբրահամյանի, այնպես էլ Կարեն Կարապետյանի ղեկավարած կառավարության քաղաքական պատասխանատուն Հանրապետական կուսակցությունն է: Ազգային Ժողովում լրագրողների հետ զրույցում ասաց ՀՀԿ խոսնակ, ԱԺ փոխխոսնակ Էդուարդ Շարմազանովը:

«Այս կառավարության քաղաքական տերը Հայաստանի Հանրապետական կուսակցությունն է և մենք պատասխանատու ենք ինչպես դրականի, այնպես էլ բացթողումների համար»,- ասաց նա:

Լրագրողի դիտարկմանը՝ կարճ ժամանակահատվածում այս նախարարները նույնպես կհանրապետականացվե՞ն, Շարմազանովը չհամաձայնեց՝ նախ հիշեցնելով, որ Հայաստանում գործում է մտքի ու խղճի ազատություն, ապա չբացառելով, թե նորանշանակ նախարարները ևս կարող են ՀՀԿ-ի շարքերն ընդգրկվել: «Նրանք ինքնուրույն որոշում կկայացնեն՝ անդամագրվել ՀՀԿ-ին, թե՝ ոչ, բայց, այո՛, չեմ բացառում, որ նրանք մեր քաղաքական թիմում ընդգրկվեն, բայց մեր թիմի ներկայացուցիչները կարող են լինել նաև անկուսակցականներ»,- ավելացրեց նա:

Շարմազանովի համոզմամբ, գլոբալ առումով, նորանշանակ նախարարներն արդեն ՀՀԿ քաղաքական թիմի անդամներ են, քանի որ այդ քաղաքական թիմի ղեկավարն այսօր մեկն է՝ ՀՀ նախագահ Սերժ Սարգսյանը:

Լրագրողների հարցին՝ ինչու Հովիկ Աբրահամյանի նախկին կաբինետի որոշ անդամներ վերանշանակվեցին, մյուսները՝ ոչ, և ո՞րն էր դրա տրամաբանությունը, Ձեզ խանգարո՞ւմ էին Գագիկ Խաչատրյանը, Գագիկ Բեգլարյանն ու մյուսները, Շարմազանովն ավելացրեց, թե խնդիրն անձերի մեջ չէ:

«Մի օր էլ ես կարող է ԱԺ փոխխոսնակ չլինեմ, բայց դա չի նշանակում, թե ես վատ եմ աշխատել կամ խանգարում եմ: Ես երբեք անձերի մասին չեմ խոսում, այլ հակառակը՝ երևույթն եմ մատնանշում: Անձերն իրենց խնդիրը լուծել են, հիմա էլ նոր խնդիր է դրվել: Համոզված եմ, որ Կարեն Կարապետյանն ու մյուսներն այդ խնդիրը կլուծեն: Բոլոր նրանք, ովքեր կկարողանան կատարել կառավարության լավագույն ծրագրերը, ՀՀԿ-ի ու Նախագահի հանձնարարականները, նրանք այսօր նշանակվում են»,- ասաց նա: