2012 թ. մայիս ամսվա վերաֆինանսավորման տոկոսադրույքի վերաբերյալ

2012 թվականի մայիսի 8-ի ՀՀ ԿԲ խորհրդի նիստին մասնակցում էին՝ ՀՀ ԿԲ նախագահ Արթուր Ջավադյանը, նախագահի տեղակալ Ներսես Երիցյանը, խորհրդի անդամներ Աշոտ Մկրտչյանը, Օլեգ Աղասյանը, Ահարոն Չիլինգարյանը, Վախթանգ Աբրահամյանը:

Խորհրդի նիստը սկսվեց ապրիլի վերջի դրությամբ Իրավիճակային հաշվետվության ներկայացմամբ: Քննարկվեցին գնաճի, արտաքին միջավայրի, իրական, հարկաբյուջետային և դրամավարկային հատվածների զարգացումները:

2012 թվականի ապրիլին արձանագրվել է 0.6% գնանկում, ինչի արդյունքում 12-ամսյա գնաճը, նախորդ ամսվա ցուցանիշի նկատմամբ նվազել է 0.3 տոկոսային կետով և կազմել 1.9%: Ընդ որում, պարենային ապրանքների գների աճի նպաստումը 12-ամսյա ցուցանիշին կազմել է 0.8 տոկոսային կետ, ոչ պարենային ապրանքներինը՝ 0.7 տոկոսային կետ, ծառայությունների սակագների աճի նպաստումը՝ 0.5 տոկոսային կետ: Ամսական գնանկումը պայմանավորված է եղել հիմնականում բանջարեղենի գների 7.6% անկմամբ, որի նպաստումը կազմել է 0.5 տոկոսային կետ:

Տնտեսական ակտիվության ցուցանիշը 2012 թվականի հունվարի-մարտին նախորդ տարվա նույն ժամանակահատվածի նկատմամբ կազմել է 6.1%: Արդյունաբերության ճյուղի թողարկման ծավալների աճը կազմել է 16.4%, ծառայությունների ծավալներինը՝ 11.5%: Գյուղատնտեսության ճյուղում նախորդ տարվա համապատասխան ժամանակահատվածի համեմատությամբ թողարկման ծավալները չեն փոփոխվել, իսկ շինարարության ճյուղում արձանագրվել է անկում՝ 5.5%:

2012թ. հունվար-մարտին նախորդ տարվա նույն ժամանակահատվածի նկատմամբ ընթացիկ հաշվի բարելավման միտումը շարունակվել է՝ հիմնականում պայմանավորված ֆիզիկական անձանց դրամական փոխանցումների աճով և ապրանքային հաշվեկշռի պակասուրդի նվազմամբ: Արտաքին ապրանքաշրջանառությունը բնութագրող ցուցանիշները հետևյալն են. 2012 թվականի հունվար-մարտին նախորդ տարվա նույն ժամանակահատվածի համեմատությամբ արտահանումն (ըստ առևտրի վիճակագրության՝ ՖՕԲ) ավելացել է 32.4%-ով, իսկ ներմուծումը (ըստ առևտրի վիճակագրության ՍԻՖ)՝ 9.8%-ով:

2012 թվականի տարեսկզբին հարկաբյուջետային քաղաքականությունը համախառն պահանջարկի վրա թողել է զսպող ազդեցություն՝ հիմնականում պայմանավորված պետական ծախսերի տնտեսումներով:

Խորհրդի նիստում ներկայացվեցին նաև ֆինանսական շուկայի զարգացումները: Հիմնվելով մինչև տարեվերջ գնաճի կանխատեսումների վրա՝ ԿԲ ապրիլին շարունակել է չեզոք դրամավարկային քաղաքականության իրականացումը, և ֆինանսական շուկայում, ընդհանուր առմամբ, տոկոսադրույքներն անփոփոխ են մնացել: Շուկայական ռեպո միջին տոկոսադրույքը կազմել է 9.92 %, միջբանկային ռեպո տոկոսադրույքը՝ 9.45%, մինչև 1 տարի մարման ժամկետով պետական պարտատոմսերի առաջնային շուկայում միջին տոկոսադրույքը՝ 8.93%, բորսայական միջբանկային վարկերի միջին տոկոսադրույքը՝ 8.64%:

2012թ. ապրիլին արտարժույթի շուկայում դրամի միջին շուկայական փոխարժեքը նախորդ ամսվա համեմատ դրսևորել է հետևյալ միտումները. ԱՄՆ դոլարի նկատմամբ արժեզրկվել է 0.74 տոկոսով՝ կազմելով 392.02 դրամ, Եվրոյի նկատմամբ փոխարժեքը արժեզրկվել է 0.35 տոկոսով՝ կազմել 515.98 դրամ, ՌԴ ռուբլու նկատմամբ մնացել է գրեթե անփոփոխ՝ կազմելով 13.29 դրամ:

Ֆինանսական շուկայի նկարագրված զարգացումների ներքո դրամավարկային ցուցանիշները ապրիլի 28-ի դրությամբ արձանագրել են հետևյալ շարժերը. 12-ամսյա կտրվածքով դրամային ավանդների 41.1% աճի պայմաններում դրամային զանգվածն առաջանցիկ՝ 23.7% աճ է արձանագրել փողի զանգվածի 20.7% աճի համեմատությամբ: Արտարժութային ավանդների 12-ամսյա աճը կազմել է 16.9% (բացառելով փոխարժեքի փոփոխության ազդեցությունը՝ 11.2%): Արդյունքում, դոլարայնացման մակարդակն այդ ժամանակահատվածում նվազել է 1.4 կետով (ավելի, քան 3%-ով): Վարկավորման աճը շարունակվել է և կազմել է 32.9%:

Իրավիճակային հաշվետվության քննարկումից հետո խորհուրդը սկսեց քննարկումներն արտաքին և ներքին մակրոտնտեսական զարգացումների, դրամավարկային քաղաքականության ուղղությունների վերաբերյալ:

2012 թ. ապրիլին հիմնական հումքային և արդյունաբերական ապրանքների միջազգային գներն, ընդհանուր առմամբ, դրսևորեցին գնանկումային միտումներ

Պարենի և գյուղատնտեսության կազմակերպության (FAO) կողմից հրապարակվող պարենի գների ինդեքսը 2012 ապրիլին նախորդ ամսվա նկատմամբ նվազել է 1.4%, որի պայմաններում նախորդ տարվա նույն ժամանակահատվածի համեմատությամբ նվազումը կազմել է 8.9%: Ցորենի միջազգային գինն ապրիլի ընթացքում նվազել է 6.2%-ով, շաքարավազինը՝ 7%-ով, բրնձի միջազգային գինը ապրիլին ավելացել է 6.5%-ով՝ Ինդոնեզիայում տարվա հիմնական ցանքաշրջանում սպասվածից քիչ գնահատված բերքահավաքով: Բացի այդ, բրնձի շուկայում շարունակվում են պահպանվել անորոշությունները՝ Թայլանդում պետական մեխանիզմների կիրառման հետ կապված:

Արդյունաբերական մետաղներից պղնձի գինը 2012թ. ապրիլին նվազել է 2.7%-ով, նավթի գինը՝ 3.5%ով:

Չնայած տարեսկզբին արձանագրված նավթի միջազգային գների աճով պայմանավորված գնաճային դրսևորումներին, ԱՄՆ ԴՊՀ-ն, հիմք ընդունելով ԱՄՆ-ում սպասվող տնտեսության զարգացման չափավոր տեմպերը, դրամավարկային քաղաքականության տոկոսադրույքն ապրիլին կրկին թողեց անփոփոխ՝ 0-0.25% միջակայքում:

Չնայած 2012թ.-ին կանխատեսվող թիրախից բարձր գնաճին՝ տնտեսության ցածր ակտիվության պայմաններում Եվրոպական Կենտրոնական բանկը մայիսին կրկին անփոփոխ թողեց քաղաքականության տոկոսադրույքը:

Խորհուրդը գնահատեց, որ պարենային և հումքային ապրանքների միջազգային շուկաներից ՀՀ-ում գնաճային միջավայրի վրա ճնշումներ չեն ակնկալվում. չնայած այդ ապրանքների (հիմնականում՝ նավթ, ցորեն) հարաբերական գների տատանումներին, ընդհանուր առմամբ, դրանց ազդեցությունը գնահատվում է չեզոք:

Խորհուրդն արձանագրեց, որ ՀՀ տնտեսության զարգացումները նույնպես գնաճային միջավայրի ընդլայնում չեն նախանշում. մասնավոր ծախսումների աճը և հարկաբյուջետային քաղաքականության ազդեցությունը ոչ գնաճային են:

Խորհուրդն ամփոփեց, որ համաշխարհային և ՀՀ տնտեսությունները զարգանում են ըստ 2012 թվականի առաջին եռամսյակի Դրամավարկային քաղաքականության բազային սցենարի: Ներկայումս իրատեսական է կանխատեսվող 12-ամսյա ժամանակահատվածում գնաճի ձևավորումը 4% նպատակային ցուցանիշի ±1.5 տոկոսային կետ տատանումների թույլատրելի միջակայքում, և այս պահին նպատակահարմար է պահպանել քաղաքականության տոկոսադրույքի 8% մակարդակը, որը գնաճային միջավայրի վրա կթողնի չեզոք ազդեցություն:

Խորհուրդը միաժամանակ նշեց, որ տնտեսության զարգացման նկարագրված միտումների շարունակականության դեպքում կանխատեսվող գնաճը կձևավորվի տատանումների թույլատրելի միջակայքի ստորին հատվածում: Այս պարագայում խորհուրդը կդիտարկի դրամավարկային պայմանների թուլացման անհրաժեշտությունը:

2012 թվականի մայիսի 8-ի նիստում ԿԲ խորհուրդը որոշեց անփոփոխ թողնել ԿԲ վերաֆինանսավորման տոկոսադրույքը՝ 8.0%: Լոմբարդային ռեպոյի և ներգրավված միջոցների տոկոսադրույքները սահմանվում են համապատասխանաբար՝ 11.0% և 5.0%: