Գողությունը գողանալ բառը չէ. Գալուստ Սահակյան

Գողությունը գողանալ բառը չէ: ԱԺ-ում լրագրողների հետ զրույցում ԱԺ նախագահ Գալուստ Սահակյանն այսպես բացատրեց ՀՀ վարչապետ Կարեն Կարապետյանի կողմից արված «պրիմիտիվ գողությունների» մասին հայտարարությունն, ում համոզմամբ գողություն բառն ասված է փոխաբերական իմաստով:

«Այն երևույթը, որը կառավարության անդամները ներքևից մինչև վերև պետք է օգտագործեն, երբեմն-երբեմն չի կատարվում, և դա համարվեց որպես գողություն: Իսկ եթե որևէ մեկը' ես կամ դու, գիտենք՝ ովքեր են գողերը, դա ինչ-որ հայտարարելու բան չի, որովհետև հիմնարկներ կան, որտեղ գրում ես, որ սա գող է, և այդ գողին բռնում, տանում են»,- մանրամասնեց նա:
Իսկ, թե կառավարության գողությունների համար հիմա ո՞վ պետք է գրի, ԱԺ նախագահը նշեց, որ նա, ով տեսել է այդ գողությունները: «Քիչ առաջ բացատրեցի, որ դա Ձեր իմացած գողությունը չէ»,- հավելեց նա:

Լրագրողի դիտարկմանը, որ վարչապետը նկատի է ունեցել չարաշահումները, ավիատոմսերի ծախսերը, Գալուստ Սահակյանը համոզմունք հայտնեց, որ վարչապետը նկատի է ունեցել, որ այսուհետև ավիատոմսերը պետք է ձեռքբերվեն գործող ընթացակարգով:
«Գնում են տարբեր տեղերից տոմսեր են առնում, գնում են, բայց հիմա այդպես չի լինելու: Այսինքն՝ այն, ինչը որ կառավարությունը կարգ է համարում, այդ կարգից ոչ բոլորն են օգտվում: Վարչապետն էլ ասում է, որ նման բաները պետք է վերացվեն»,- ասաց նա:
Ինչ վերաբերում է շարունակվող ատկատներին, գողություններին ու թալանին, ապա Գալուստ Սահակյանն այդպես չի կարծում: Հակառակը, եթե իսկապես ատկատներ կան, ապա դրա համար կարող են դիմել գոյություն ունեցող համապատասխան մարմիններին: «Այսօր Խորհրդարանում, մանավանդ վերջին պահերին, բոլորը խոսում են իրենց ասած ատկատների, կաշառակերության, ու ամեն ինչը ոչնչացնելու մասին: Բայց ասեմ հետևյալը. Սրանք բոլորը ժամանակին մեր հետ միասին եղել են իշխանության մեջ և այսօր խոսում են ինչ-որ ատկատների մասին: Ատկատների մասին ոչ մի նորմալ մարդ չի խոսում»,- ասաց նա:

Դիտարկմանը՝ այսինքն, նրանք էլ են մասնակցել այդ ատկատներրին, Գալուստ Սահակյանը չմանրամասնեց. «Ես ավելի մեծ բան ակնարկեցի, բայց դուք ավելի փոքր բան հասկացաք»:

Հակադարձմանն՝ ի՞նչ է, պետք է լռեին, Գալուստ Սահակյանն արձագանքեց. «Որևէ նորմալ մարդ չի ասում դրա մասին, բայց այսօր խոսում են նրանք, ովքեր ժամանակին եղել են իշխանության մեջ: Իսկ ես մտածում եմ՝ այդքան բաները՝ ատկատներ, գողություններ և այլն, սրանք ոնց են տեսել, որ ես չեմ տեսել»,- եզրափակեց նա:

Արմինե Եփրեմյան