Կա հանրային պահանջ՝ բացահայտելու եկեղեցու ֆինանսական աղբյուրները. Ստեփան Դանիելյան

ԱԺ պատգամավոր, նախկին վարչապետ Հրանտ Բագրատյանը ԱԺ արտահերթ նստաշրջանի ժամանակ առաջարկեց հարկել հայ առաքելական եկեղեցին: Թեմայի վերաբերյալ ԼՈՒՐԵՐ.com-ը զրուցեց «Համագործակցություն հանուն ժողովրդավարության» ՀԿ նախագահ Ստեփան Դանիելյանի հետ՝ պարզելու վերջինիս տեսակետը։ Նա մեզ հետ զրույցում ասաց, որ ինքը կողմ է Բագրատյանի առաջարկին, եկեղեցին պետք է հարկել։

Դանիելյանը նշեց՝ եկեղեցին հարկելուց առաջ նախ պետք է հասկանալ, թե որոնք են եկեղեցու ֆինանսավորման աղբյուրները: «Եթե եկեղեցին զբաղվում է բիզնես գործունեությամբ, ունի հողատարածքներ, եկամուտ հետապնդող կազմակերպություններ, վարձու աշխատողներ, ապա, բնականաբար, պետք է հարկվի: Նախ պետք է քննարկվի, թե կոնկրետ ինչ նկատի ուներ Բագրատյանը: Եթե խոսքը գնում է պատմամշակութային կոթողների մասին, որոնք գտնվում են եկեղեցու տրամադրության տակ, դրանք չպետք է հարկվեն, պարզապես պետք է եկեղեցին պատասխանատվություն կրի այդ կոթողների պահպանման համար: Եթե եկեղեցին պահանջը չկատարի, այդ կոթողները պետք է վերադարձվեն պետությանը, որը կստանձնի դրանց պահպանումը: Իսկ եթե խոսքը եկամուտ հետապնդող կազմակերպությունների մասին է, որոնք եկեղեցու տարածքում են, դրանք պետք է հարկվեն»,- մանրամասնեց մեր զրուցակիցը։

Նրա խոսքով՝ եկեղեցին Հայաստանի խոշորագույն կառույցներից է, որը ոչ միայն սնվում է բարեգործությամբ, այլ նաև զբաղվում է բարեգործությամբ: «Պետք է, բնականաբար, պարզել, թե ո՞րտեղից եկեղեցուն այդքան գումար: Երկար տարիներ է, ինչ կա հանրային պահանջ՝ բացահայտելու եկեղեցու ֆինանսական աղբյուրները: Եկեղեցու հետևորդները՝ քրիստոնյաները պետք է պահանջեն ֆինանսական աղբյուրների բացահայտումը և, մերժվելու դեպքում, դիմեն դատարան»,- իր խոսքը եզրափակեց Ստեփան Դանիելյանը։