ՀՅԴ-ի ցայտնոտային «շախը»` Կարեն Կարապետյանին

Վարչապետափոխության գործընթացում ինտրիգայիններից մեկը դարձավ Կարեն Կարապետյանի և ՀՅԴ-ի բավականին բարդ հարաբերությունները: Ի վերջո` միջանկյալ լուծում գտնվեց: ՀՅԴ-ն պահպանեց իր կոալիցիոն կարգավիճակը, նաև պորտֆելների թիվը կառավարությունում, բայց դաշնակցականները հասկանում են, որ այս պայմանավորվածությունները ժամանակավոր են ու լավագույն դեպքում գործելու են մինչև խորհրդարանական ընտրությունները:

ՀՅԴ-ն, ըստ ամենայնի, հայտնվել է ցայտնոտային իրավիճակում, ինչը ենթադրում է քայլեր՝ վաբանգային տրամաբանությամբ: Այս համատեքստում պատահական չեն ՀՅԴ խմբակցության ղեկավար Արմեն Ռուստամյանի մեկնաբանությունները՝ վարչապետի հայտնի «պրիմիտիվ գողություն» արտահայտությանը: Դաշնակցական գործիչն, ով ընդամենը երկու շաբաթ առաջ Կարապետյանին մեղադրում էր շոումենության մեջ, հիմա ասում է, որ վարչապետի հայտարարությունը պետք է քրեական գործի նյութ դառնա: Այլ խոսքով՝ պետք է բացահայտվեն գողերը, ովքեր տվյալ դեպքում նախկին կամ գործող նախարարներ են: Կարող է նույնիսկ թվալ, թե ՀՅԴ-ն քաջալերում է Կարեն Կարապետյանին, նրան դուխ է տալիս, որպեսզի մինչև վերջ բացահայտվի այն հանցավոր սխեման, որ գործել է ավիատոմսերի պետգնումների գործընթացում: Սակայն, սա արտաքուստ: Իրականում՝ ՀՅԴ-ն իշխանության մաս լինելով հասկանում է, որ անգամ մեծ ցանկության դեպքում Կարապետյանի աղմկոտ հայտարարությունը գոնե այս պահին իրավական հետևանք ունենալ չի կարող: Գլխավորապես այն պատճառով, որ վարչապետի ասած «պրիմիտ գողությունն» իրականում այնքան էլ պրիմիտիվ չէ:

Գործ ունենք, ըստ էության, համակարգային կոռուպցիայի դրսևորման, ալան-թալանի մի մեխանիզմի հետ, որը քրեաօլիգարխիայի սնուցման աբյուրներից մեկն է: «Պրիմիտիվ գողերի» հետևից ընկնելով Կարապետյանը կարող է հասնել քրեաօլիգարխիայի դուռը, որտեղից նահանջել այլևս չի կարող:

Եթե անգամ քրեաօլիգարխիայի վերացումն առաջնահերթություն է Կարապետյանի համար, այս պահին նա չունի ռեսուրսներ այդ պայքարը սկսելու և դրանում հաղթելու համար:

Բացի այդ առջևում ընտրություններ են և քրեաօլիգարխիայի դեմ բացահայտ պատերազմը կարող է վտանգել իշխանության վերարտադրության ցանկությունը: 

Կառավարությունում «պրիմիտիվ գողե՞ր» են, թե՞ «մեծ շնաձկեր»՝ Կարապետյանի հայտնի հայտարարությանը հիմա իրավական ընթացք չի տրվելու: Դա ՀՅԴ-ում հրաշալի հասկանում են, բայց պնդում են մեղավորների իրավական պատասխանատվության անհրաժեշտությունը: Պնդում են, որպեսզի հետո կարողանան ասել, որ Կարեն Կարապետյանն ընդամենը դատարկ խոսքեր է ասում՝ առանց քաղաքական և իրավական հետևանքների:

Այլ խոսքով, ՀՅԴ-ն «շախ» է հայտարարել Կարապետյանին: Բայց շախմատային ոչ բոլոր կոմբինացիաներում է «շախը» վերածվում «մատի» մանավանդ, երբ քայլ անողն ակնհայտ ցայտնոտի մեջ է:

Սարգիս Հակոբյան