Սևանի քաղաքապետ Ռուդիկ Ղուկասյանը հատել է բարոյական բոլոր նորմերը

Սևանում առաջադրված ՀՅԴ-ական թեկնածու Արտակ Վարդանյանը, ով ընտրություններից մի քանի օր առաջ որոշեց ինքնաբացարկ ներկայացնել, LՈՒՐԵՐ.com-ի հետ զրույցում իր որոշումը այսպես պարզաբանեց. «Միասնական, համախմբման ճանապարհով գնալու որոշումն էր պատճառը»։

Հիշեցնենք, որ մամուլն այսօր գրել էր, թե համաձայնություն կա կուսակցությունների միջև, որ Արտակ Վարդանյանն իր թեկնածությունը հանի, որպեսզի ՀՀԿ-ի թեկնածուի հաղթանակից հետո փոխմարզպետի պաշտոնը ՀՅԴ թեկնածուին հանձնվի: Արտակ Վարդանյանը չցանկացավ մեկնաբանել՝ արդյոք իրեն նման առաջարկ եղել է, թե՝ ոչ, սակայն հավելեց, որ ՀՅԴ-ի ու ՀՀԿ-ի միջև չկան որևէ պայմանավորվածություններ։ «Ես չգիտեմ, թե ինչ պայմանավորվածությունների մասին եք խոսում, բայց այդ լուրերը չեն համապատասխանում իրականությանը: Բոլոր մեր պայմանավորվածությունները համատեղ ծրագրերի շուրջ են լինում, այլ պայանավորվածություններ չկան»,- վստահեցրեց նա:

Թե Արտակ Վարդանյանն ո՞ւմ է պատրաստվում սատարել այս ընտրություններում նա ավելացրեց՝ Սարգիս Մուրադյանին: Հարցին՝ ինչո՞ւ նա չի պատրաստվում սատարել գործող քաղաքապետ Ռուդիկ Ղուկասյանին, Վարդանյանը նշեց, որ ընտրարշավի ընթացքում վերջինս հատել է բարոյական բոլոր նորմերը, հետևաբար ինքը չի կարող սատարել մեկին, ով իր հասցեին հայհոյանքներ ու լուտտանքներ է թափում: «Ռուդիկի հետ մեր հարաբերությունները մինչև ընտրարարշավը շատ նորմալ, մարդկային էին, բայց վերջին շրջանում նա հատեց բոլոր սահմանները: Նրա վիրավորանքներն արդեն հայհոյանքի բնույթ են կրում, որի պատճառով էլ ես չեմ պատրաստվում նրան աջակցել»,- ասաց նա:

Ի դեպ՝ նշենք, որ մամուլը գրել էր, որ Ռուդիկ Ղուկասյանը թեև Հանրապետական կուսակցությունից է, սակայն Հանրապետականները որոշել են նրան այլևս չաջակցել:
Ա. Վարդանյանը մեզ հետ զրույցում նշեց, որ նա հոկտեմբերի 2-ին կայանալիք ընտրություններին չի հաղթի, քանի որ չի վայելում սևանցիների համակրանքը: «Նա ոչ մի շանս չունի, քանի որ հանրությունը նրան այլևս չի վստահում ու ընդունում»,- ասաց նա:

Մենք փորձեցինք կապ հաստատել նաև Ռուդիկ Ղուկասյանի հետ, սակայն վերջինիս հեռախոսահամարն անհասանելի էր, իսկ Սևանի քաղաքապետարանից պատասխանեցին, որ նա տեղում չէ, և լրագրողներին հարցազրույցներ այլևս չի տալիս:

Արմինե Եփրեմյան