Օլիմպիական մրցանակակիրներն` Էջմիածնի պատվավոր քաղաքացի (տեսանյութ)

Էջմիածնի տոնի միջոցառումները մեկնարկեցին տարիների ընթացքում ձեւավորված ավանդույթի հարգմամբ: Նախ քաղաքի ակտիվը' քաղաքապետ Կարեն Գրիգորյանի գլխավորությամբ ծաղիկներ խոնարհեց Զվարթնոց թաղամասում գտնվող պանթեոնում, ուր հանգչում են Արցախյան ազատամարտի նահատակ էջմիածնեցիների աճյունները: Ապա ծաղկադրման արարողություն էր Հայրենական մեծ պատերազմի հուշահամալիրի մոտ:

Քանի որ այսօր նաեւ գրադարանի աշխատողի օրն է, հետաքրքիր միջոցառում էր կազմակերպվել նաեւ քաղաքի կենտրոնական գրադարանում:

Ավանդույթի պահպանում կարելի է համարել նաեւ գեղանկարների ցուցահանդեսի բացումը, համայնքի ավագանու տոնական նիստը, ծաղկադրումը Արցախյան հաղթանակը խորհրդանշող «Հաղթանակ» հուշարձանին:

Ավանդական է նաեւ տոնական հանդիսավոր նիստը: Այստեղ Էջմիածնի պատվավոր քաղաքացու կոչում հանձնվեց Ռիոյի օլիմպիական մրցանակակիր էջմիածնեցի մարզիկներին' Միհրան Հարությունյանին եւ Սիմոն Մարտիրոսյանին: Քաղաքապետ Կարեն Գրիգորյանը մշտական հոգածության ներքո է պահում բոլոր բնագավառները' բարեկարգում, կանաչապատում, կրթություն, մշակույթ, նաեւ' սպորտ: Եվ պատահական չէ, որ էջմիածնեցի մարզիկներն էլ ոչ միայն քաղաքի, այլեւ Հայաստանի Հանրապետության եւ աշխարհասփյուռ հայ ազգի պատիվն են բարձր պահում միջազգային մրցասպարեզներում: Պատվավոր քաղաքացու կոչում ստացան նաեւ մաեստրո Ռուբեն Շարբաթյանը, նկարիչ-դիզայներ Ներսես Մելիքյանը, բանաստեղծ Խաչիկ Մանուկյանը, ժողովրդական վարպետ, Էջմիածնի դրոշի եւ զինանշանի հեղինակ Արշակ Մանուկյանը: Հայ առաքելական եկեղեցու Արմավիրի թեմի առաջնորդ Սիոն եպիսկոպոս Ադամյանն էլ արժանացավ «Քաղաքի բարեկամ» կոչման:

Տոնական տրամադրությունն Էջմիածնում կպահպանվի նաեւ առաջիկա 2 օրերին: Հոկտեմբերի 8-ին անվանակոչության արարողություն է Մշակույթի պալատի հարակից այգում, որ կարճ ժամանակահատվածում շքեղ տեսքի է բերվել: Նույն օրը նաեւ Տիգրան Մեծի արձանի բացումը կլինի: Իսկ հոկտեմբերի 9-ին նախատեսված են տոնական շքերթ, տաղավարների ցուցադրություն, բարձրաճաշակ համերգ, որ կուղեկցվի գունեղ հրավառությամբ: