Հայաստանի հավաքականը ֆիզիկապես և տակտիկապես լավ է պատրաստված. Ռումինիայի ընտրանու մարզիչ

Միշտ էլ ավելի լավ է չլինել ֆավորիտ, քանի որ, որքան էլ թղթի վրա լինես ֆավորիտ, պետք է դա ապացուցես խաղադաշտում: ԼՈւՐԵՐ. com-ի թղթակցի փոխանցմամբ, ԱԱ 2018-ի ընտրական փուլի Հայաստան-Ռումինիա խաղից առաջ, այդ մասին լրագրողների հետ զրույցում ասաց Ռումինիայի ազգային ընտրանու գլխավոր մարզիչ Քրիստոֆ Դաումը:

Այն հարցին, թե արդյո՞ք կտեսնենք հարձակվողական խաղ վաղվա հանդիպմանը` Ռումինիայի մարզիչը նշեց.

«Դա կախված է նրանից, թե ինչպես կզարգանան իրադարձությունները վաղվա խաղում: Դիտել ենք Դանիայի դեմ Հայաստանի հավաքականի հանդիպումը: Կարող եմ ասել, որ Հայաստանի հավաքականը կարող էր նաև ոչ-ոքի խաղալ, քանի որ 100 տոկոսանոց պահ ուներ: Հայաստանի հավաքականը ֆիզիկապես և տակտիկապես լավ է պատրաստված: Դա այն է, ինչ նկատեցի Դանիայի դեմ խաղում: Մենք չենք կարող ասել, որ վաղը դուրս ենք գալու խաղադաշտ և անպայման հարձակվողական ֆուտբոլ ենք խաղալու ու հաղթելու, պետք է կարողանանք բալանսը պահպանել, քանի որ Հայաստանի հավաքականի հակագրոհները շատ վտանգավոր են»:

Խոսելով Հենրիխ Մխիթարյանի բացակայության, ինչպես նաև, Ռումինիայի ընտրանու ֆավորիտ լինել-չլինելու մասին՝ մարզիչն ասաց.

«Իհարկե, Մխիթարյանը հիանալի ֆուտբոլիստ է: Մենք խոսել ենք Լուչեսկուի հետ, ով «Շախտյորում» աշխատել է Մխիթարյանի հետ: Այնտեղ նա զարգացրեց իր որակները, տեղափոխվեց Դորտմունդի «Բորուսիա», հետագայում մեկ քայլ էլ առաջ արեց, և խաղում է «Մանչեսթեր Յունայթեդում»: Ոչ-ոք չի վիճարկում, որ նա ֆանտաստիկ խաղացող է և այդպիսին կլիներ ցանկացած հավաքականի համար: Միշտ էլ ավելի լավ չլինել ֆավորիտ, քանի որ, որքան էլ թղթի վրա լինես ֆավորիտ, պետք է դա ապացուցես խաղադաշտում: Մենք Եվրո 2016-ի ժամանակ տեսանք, որ  բազմաթիվ ֆավորիտ հավաքականներ դուրս մնացին պայքարից»: