Լավատեսորեն ենք տրամադրված. ամեն դեպքում մարտական ոգին չի բացակայում. Վարուժան Սուքիասյան

Ֆուտբոլիստները բոլորը պատրաստ են իրենց հնարավորության սահմանում: Վաղն ինձ թվում է՝ անմնացորդ նվիրումով են խաղալու: ԼՈւՐԵՐ. com-ի թղթակցի փոխանցմամբ, ԱԱ 2018-ի ընտրական փուլի Հայաստան-Ռումինիա խաղից առաջ, այդ մասին լրագրողների հետ զրույցում ասաց Հայաստանի ազգային ընտրանու գլխավոր մարզիչ Վարուժան Սուքիասյանը:

Խոսելով թիմի շանսերի մասին՝ մարզիչն ասաց.

«Լավատեսորեն եմ տրամադրված, կարծում եմ՝ տղաներն էլ նույն տրամադրությամբ պետք է մտնեն դաշտ: Մարտական ոգին, ամեն դեպքում, չի բացակայում»:

Խոսելով Մխիթարյանի բացակայության մասին՝ մարզիչն ասաց.

«Մինչև երեկ անընդհատ բանակցությունների մեջ էինք: Երեկ Մխիթարյանը պետք է զրույց ունենար բժիշկների հետ և նրան չեն թույլատրել գալ»:

Իսկ թե՝ արդյո՞ք Մխիթարյանի բացակայությունը լրացուցիչ շարժառիթ կլինի ֆուտբոլիստների համար՝ մարզիչն ասաց.

«Սպորտային բախտը մեզ համար բարեհաճ չի գտնվել: Սպասենք մինչև վաղվա խաղը, տեսնենք տղաների տրամադրվածությունն ու մարտական ոգին»:

Այն դիտարկմանը, որ հավաքական քիչ հարձակվողներ են հրավիրվել, մարզիչն ասաց.

«Ես դիտարկում եմ բոլոր ֆուտբոլիստներին, հնարավոր չէ մեկին աչքիցս բաց թողնեմ: Ամեն դեպքում, սպասենք մինչև վաղը: Այդ ֆուտբոլսիտներից երևի 80-90 տոկոսը իրենց ակումբներում չեն խաղում, խաղային պրակտիկա չունեն, խեղճանում են ֆիզիկական պատրաստվածությամբ, խաղային պրակտիկայով: Այն ֆուտբոլիստները, ովքեր, թեկուզ մեզ մոտ, ունենում են ավելի շատ խաղային պրակտիկա, ինձ թվում է նրանք ավելի լավ կխաղան: 

Խոսելով Օզբիլիսի մասին՝ հավաքականի մարզիչը հավելեց.

«Օզբիլիսը իր փորձով, ֆուտբոլային մտածելակերպով կարծում եմ՝ մեզ կօգնի»:

Մրցակցի գլխավոր մարզչին անդրադառնալիս՝ Սուքիասյանն ասաց.

«Նա փորձառու մարզիչ է, շատ թիմեր է ղեկավարել, նրա մասնագիտական որակների մասին հարցերն՝ ավելորդ են»:

Այն հարցին, թե ոչ-ոքին կբավարարի մեզ, մարզիչն ասաց.

«Այդ հարցին դուք պետք է պատասխանեք»:

Վերջում մարզիչն հավելեց.

«Ակնկալում եմ լարվածության թուլացում: Ոգևորեք մեր հավաքականին, նրանք ձեր ոգևորության կարիքն ունեն»: