Մեկ տարի հետո դրամը կտրուկ կարժեզրկվի. Հրանտ Բագրատյան

Դոլարի փոխարժեքն արդեն մի քանի օր է, ինչ անընդհատ բարձրանում է։ Այժմ մեկ ԱՄՆ դոլարի փոխարժեքը կազմում է 401 դրամ:
Լուրեր.com-ը նախկին վարչապետ, ՀԱԿ անդամ Հրանտ Բագրատյանից հետաքրքրվեց, թե ինչով է պայմանավորված դոլարի փոխարժեքի նման տատանումը։ Նրա խոսքերով՝ դոլարի կուրսի բարձրացումը կապված է մի քանի հանգամանքների հետ։

«Դոլարը ողջ աշխարհում արժեվորվում է՝ նախ և առաջ նավթի գների անկման պատճառով։ Այսօրվա վիճակով առկա է նավթի 15-30 տոկոս գնանկում: Դժբախտաբար, վառելիքի գնանկումը հայաստանյան շուկայում գրեթե չի արտացոլվում: Բացի վերը նշվածից, Հայաստանում դոլարի փոխարժեքը փոփոխվել է, քանի որ երկրի վճարման հաշվեկշիռը վատն է։ Մենք ավելի շատ ենք դոլարով վճարում, քան մեզ են վճարում։ Բացի այդ, երկրից կապիտալը փախչում է։ Նաև լուրջ ազդեցություն ունեցան ընտրակաշառքները, որոնք բաժանվել են ժողովրդին, որովհետև Կենտրոնական բանկն այդ շրջանում դրամի էմիսիան ավելացրեց։ Ի վերջո, տնտեսությունում աճ չկա, իրական արտահանում չկա, չնայած անընդհատ տարփողող արտահանման աճին։ Իրականում այդ աճ կոչվածը վերաբերվում է միայն հանքարդյունաբերությանը, որը մենք բազմիցս ասել ենք, որ պետք է հանվի ընդհանուր մակրոտնտեսական ցուցանիշներից: Հանքարդյունաբերության փողերն էլ շատ հաճախ գտնվում են օֆշորային գոտիներում: Ընդհանուր առմամբ, եթե փոխարժեքի տատանումը հատուկ կազմակերպված լիներ ԿԲ-ի կողմից և կապված լիներ իրոք դրամի զանգվածի ավելացման հետ, նորմալ կլիներ, դա կխրախուսեր արտահանումը: Այս պարագայում սակայն, իհարկե, փոխարժեքի նման տատանումը նորմալ չէ, որովհետև բացասական դրսևորումների հետևանք է»,- ասաց Բագրատյանը:

Նախկին վարչապետը հավելեց, որ ամենայն հավանականությամբ մինչև տարվա վերջ տեղի կունենա դրամի փոքրիկ սահուն անկում, պրոցեսները չեն գահավիժի, քանի որ տրանսֆերտների աճ կա, սակայն իր գնահատմամբ՝ նախագահական ընտրություններից հետո իրավիճակը սրընթաց կերպով վատթարանալու է, եթե ընտրությունների արդյունքում նախագահի աթոռը զբաղեցնի իշխանության ներկայացուցիչը։

«Եթե ընտրությունների հետևանքով նախագահի աթոռը զբաղեցնի իշխանության ներկայացուցիչը, և այս տնտեսական կուրսը շարունակվի, ապա մեծ է հավանականությունն այն բանի, որ մեզ սպասվում է դրամի անխուսափելի և կտրուկ արժեզրկում, ինչը տեղի ունեցավ 2009-ին։ Մենք դրա ականատեսը կլինենք մոտ մեկ տարի հետո»,- հավելեց Բագրատյանը։

Ազատուհի Արասխանյան