Կայացել է «Աշխատաշուկայի եւ բարձրագույն կրթության արդի փոխգործակցության խնդիրները» խորագրով գիտագործնական հանդիպումը

ՀՀ սպորտի եւ երիտասարդության հարցերի նախարարության և ԵՊՀ շրջանավարտների եւ կարիերայի կենտրոնի համատեղ նախաձեռնությամբ կազմակերպվել է «Աշխատաշուկայի եւ բարձրագույն կրթության արդի փոխգործակցության խնդիրները» խորագրով գիտագործնական հանդիպումը:

Հայաստանյան գործատուները եկել էին ԵՊՀ` մասնակցելու աշխատաշուկա-բուհ փոխգործակցության խնդիրներին վերաբերող հանդիպմանը:
«Ազգային զեկույցը ցույց տվեց, որ զբաղվածությունը երիտասարդության թիվ 1 խնդիրն է: ՄԱԿ-ի զեկույցի համաձայն էլ` համաշխարհային ֆինանսատնտեսական ճգնաժամից ամենաշատը տուժել են երիտասարդները. մի մասը աշխատանք չի գտնում, մյուսներն էլ չեն հարմարվում շուկայական պահանջներին: Այս տեսանկյունից մենք շահագրգիռ ենք լինելու գործատու-բուհ կապի ամրապնդմանը, որը երիտասարդներին հնարավորություն կտա ավելի լավ կողմնորոշվելու շուկայում»,- միջոցառման շրջանակներում նշել է ՀՀ սպորտի եւ երիտասարդության հարցերի փոխնախարար Արսեն Քարամյանը: ԵՊՀ ռեկտոր Արամ Սիմանոյանն էլ իր հերթին նշել է, որ այս համագործակցությունը երկուստեք արդյունավետ կարող է լինել: Հանդիպման ընթացքում ներկայացվել են նաեւ վերջերս լույս տեսած Հայաստանի երիտասարդության ազգային զեկույցի որոշ հատվածներ: Եթե ազգային վիճակագրական ծառայության տվյալներով գործազուրկ է բնակչության 20.7 %-ը, ապա զեկույցի համաձայն` երիտասարդության 27.8 %-ը: «Երիտասարդական միջոցառումների իրականացման գրասենյակ» ՊՈԱԿ-ի տնօրեն Դավիթ Հայրապետյանը ներկայացրել է երիտասարդների ակնկալիքները հնարավոր աշխատավարձի, բիզնեսի միջավայրի, ընտանեկան բարեկեցության եւ մի շարք այլ հարցերի վերաբերյալ: Գործնական առաջարկներով են հանդես եկել նաև գործատուները: Դրանք քննարկվել են և առաջիկայում արդեն ակնկալվում են առաջին արդյունքները: