Հայաստանի մրցակիցների թվում է նաև Թուրքիայի ընտրանին. Եվրոպայի Մ17 առաջնության վիճակահանության արդյունքները

Շվեյցարիայի Նիոն քաղաքում կայացավ Եվրոպայի մինչև 17 տարեկանների 2017/2018 թթ. առաջնության որակավորման փուլի վիճակահանությունը:

Հայաստանի մինչև 17 տարեկանների հավաքականն ընդգրկվեց երրորդ խմբում, որտեղ նրա մրցակիցները կլինեն Չեխիայի, Թուրքիայի և Իսրայելի հավաքականները: Մրցաշարը կանցկացվի Չեխիայում:

Հանդիպումները տեղի կունենան 2017 թ. հոկտեմբերի 13-ին, 16-ին և 19-ին:

Ընդհանուր առմամբ, 52 երկրների հավաքականներ բաժանվեցին 13 խմբերի: Նրանցից հաջորդ՝ էլիտ փուլի ուղեգիր կնվաճեն խմբերում առաջին և երկրորդ տեղ գրաված թիմերը, ինչպես նաև առաջին երկու թիմերի հետ խաղերում լավագույն արդյունք ցույց տված 4 թիմ, որոնք խմբերում կզբաղեցնեն երրորդ տեղը:

Այդ թիմերը էլիտ-ռաունդում կմիանան Գերմանիային և Պորտուգալիային: Էլիտ-ռաունդի հանդիպումները կկայանան 2018 թ. գարնանը: Այստեղ 8 խմբերի հաղթողները և երկրորդ տեղ զբաղեցրած լավագույն 7 թիմերը կմիանան Անգլիային, որտեղ էլ 2018 թ. մայիսին տեղի կունենա եզրափակիչ մրցաշարը:

Այսօր՝ Երևանի ժամանակով 14:45-ին, տեղի կունենա Եվրոպայի մինչև 17 տարեկանների 2017 թ. առաջնության էլիտ-ռաունդի վիճակահանությունը: Այս մասին տեղեկացնում է ՀՖՖ-ի պաշտոնական կայքը: