«Վա՜յ Զառա, Զառա, քեզ ձայն տալը շառ ա». Շարմազանով

ԱԺ-ում բավականին լարված մթնոլորտում շարունակվում է Զինծառայողների կյանքի և առողջության փոխհատուցման հիմնադրամ ստեղծելու մասին նախագծի քննարկումը: Ելույթով հանդես են գալիս պատգամավորները: Ելույթ ունեցավ նաև ԱԺ «Ժառանգություն» խմբակցության պատգամավոր Զարուհի Փոստանջյանը, ով իր խոսքում նշեց, որ եթե նույնիսկ նախագծի անունը փոխվի և ավելի հնչեղ անուն դրվի, միևնույն է՝ նախագծի հրեշավորությունը դրանից չի փոխվելու:

«Սա հրեշավոր նախագիծ է, որովհետև վերաբերում է հետագա պատերազմական գորողություններին և դրա հետևանքով սպասվող զոհերին: Մենք դեռ չենք բոլորել ապրիլյան գործողությունների մեկ տարին, խոսում ենք նոր գործողությունների մասին: Այդ չորսօրյա պատերազմին չտրվեց ո՛չ քաղաքական, ո՛չ էլ քրեաիրավագիտական գնահատական: Մենք ունեցանք ոչ միան թանկագին կյանքերի, այլև՝ տարածքային կորուստներ: Միայն Լալե Թեփե բարձունքը գրավելու համար դեռ այն ժամանակ մենք չորս հարյուր զինվոր ենք կորցրել, իսկ այն պաշտպանելու համար մենք այսօր չենք ունեցել ո՛չ համապատասխան զինտեխնիկա, ո՛չ էլ համապատասխան զինտեխնիկան ապահովող վառելիք»,- հայտարարեց պատգամավորը:

Մեջբերելով Հելսինկյան ասոցիացիայի զեկույցը՝ պատգամավորը շարունակեց, որ այսօր մեծ թվով զինվորներ մահանում են նաև ոչ կանոնադրական հարաբերությունների հետևանքով և հարց բարձրացրեց. իսկ այս զինվորների կյանքի համար ի՞նչ փոխհատուցում է լինելու: «Փաստորեն, եթե երեխան զոհվելու է, այս փառահեղ նախագծով նրա ծնողը ոչինչ չի ստանալու: Այսինքն՝ այս ազգային տուրք պարունակող նախագիծը, որը լայն իմաստով կոռուպցիայի օրենքի նախագիծ է, նպատակ է հետանպդում նախընտրական շեմին ստեղծել մի հիմնադրամ, որտեղ պետք է գումար հավաքագրվի ոչ միայն ժողովրդից, այլև այս կոռումպացվածներից»,- շեշտեց պատգամավորն՝ հավելելով, թե իշխանությունները փորձում են ընտրությունների համար այս նախագծով ժողովրդից գումար կորզել:

Փոստանջյանը հայտարարեց նաև, որ եթե անդրադարձ է կատարվում պատերազմին, ապա գալիս է այն եզրահանգման, որ քառօրյա պատերազմը կանխամտածված է եղել, իսկ իշխանություններն այդ քանակի զոհերով փորձում են ժողովրդին ևս մեկ անգամ վախեցնել:

«Բա ովքե՞ր են պատասխան տալու, բա ո՞ւր են… Բա ովքե՞ր են պատասխանատվություն կրելու, որ տանկերը, տանկերի ակումուլյատորները չեն աշխատել, համապատասխան բուժօգնություն զինվորներին չի ցուցաբերվել, զինվորի զրահաբաճկոն չունենալու համար: Հիմա էլ եկել են նախագիծ են ներկայացնում, թե սա արվում է հետագա պատերազմների համար: Ո՞ւմ համար, ինչի՞ համար, ի՞նչ պատերազմի մասին է խոսքը, ի՞նչ եք պլանավորում այս անգամ, ո՞ր պատերազմի համար եք գումարները հավաքում… Այս կոռումպացված մարդկանց մենք պետք է հիմնադրա՞մ վստահենք… Թող իրենց անձնական գումարներրը ներդնեն ու առաջին հերթին տրամադրեն օգնություն բոլոր այն ընտանիքներին, ովքեր արդեն կորցրել են զավակ: Այո, հենց դո՛ւք եք այսօր հանձնել Լելե Թեփեն, հենց դո՛ւք եք մեղավոր, որ բոլոր նրանք, ովքեր հայտարարեցին, որ ուզում են հետ բերել այն, այսօր գտնվում են բանտախցում, հենց դո՛ւք եք մեղավոր, որ մենք չենք կարող պաշտպանություն իրականացնել: Եվ դուք հիմա ուզում եք ասել, թե մենք կարող ենք պաշտպանվա՞ծ լինել…Իհարկե՝ ո՛չ»,- հեգնեց պատգամավորը:

Փոստանջյանը շեշտեց նաև, որ որպեսզի բանակն ուժեղ լինի, զինվորը պետք է պաշտպանված լինի, պետք է պաշտպանած լինի նաև Արցախը, մինչդեռ՝ ո՛չ Արցախն է այսօր պաշտպանված, ո՛չ էլ հայ զինվորը.
«Իսկ դուք Արցախը թողել եք վիճելի տարածք և չեք ճանաչում: Նախորդ պատերազմը պայմանավորված է եղել, եղել է կանխատեսելի, սակայն համապատասխան միջոցներ մենք չենք ձեռնարկել: Պետք է պատասխանատվության ենթարկել Սերժ Սարգսյանին ու քրեական հետապնդում իրականացնել: Այս հիմնադրամը ստեղծում եք, որպեսզի հետագայում բարեգործություններով հանդես գաք: Եթե դա չէր ձեր ուզածը, ապա այստեղ դուք կբերեիք այլ օրինագծեր, այդ հիմնադրամը կստեղծեիք բոլոր նրանց համար, ովքեր իսկապես ունեն դրա կարիքը: Այո, այս նախագծին պետք է ոչ թե կողմ քվեարկել, այլ հենց դեմ: Սա սկզբունքային հարց է, որովհետև սա մեր քսանհինգ տարվա կուտակված խնդիրների գնահատականն է»,- հայտարարեց նա:

Նա ևս մեկ անգամ շեշտեց, որ Հայաստանն ունի պետական բյուջե, որը պետք է ուղղված լիներ այդ խնդիրների լուծմանը, որը, սակայն սպասարկում է բացառապես իշխանությունների շահը: Նրա խոսքով՝ այս կեղծ, գովերգելի նախագծով ստեղծվող հիմնադրամը ընտրություններից առաջ պետք է գումար հավաքագրի Սերժ Սարգսյանի համար: «Կոռումպացված մի նախարար է այստեղ նստած ու հենց նրա կնոջ հայտարարագրից պարզ է դառնում, որ հնարավոր չէ, որ նա այդքան գումարներ ունենա: Թող իրենց անձնական գումարները ներդնեն բոլոր այն ընտանիքնների համար, որոնց երեխաները զոհվել են: Ամոթ է», եզրափակեց նա:

Զարուհի Փոստանջյանի ելույթի ժամանակ երգչուհի, ՀՀԿ պատգամավոր Շուշան Պետրոսյանը սկսեց տեղից բղավել նրա վրա, իսկ Մարգարիտ Եսայանը լռելու կոչ էր անում: Ելույթից հետո նրանք ավելի բուռն սկսեցին բղավել Զարուհի Փոստանջյանի վրա: Նրանց փորձեց լռեցնել ԱԺ փոխխոսնակ Էդուարդ Շարմազանովը. «Տիկնայք հայոց աշխարհի… Վայ Զառա… այստեղ են ասել, Զառա, Զառա, քեզ ձայն տալը շառ ա»:

«Էս էլ ձեր գենդերը»,- արձագանքեց նաև հաջորդ ելույթ ունեցողը՝ ՕԵԿ պատգամավոր Հովհաննես Մարգարյանը:
«Պարոն Մարգարյան, մեր և Ձեր շարքերում գենդերը որակյալ է»,- արձագանքեց փոխխոսնակը: