Հայաստանում ազատ տնտեսական գոտիների վերաբերյալ շնորհանդես՝ ՀՀ Էկոնոմիկայի նախարարությունում

Մայիսի 24-ին, ՀՀ Էկոնոմիկայի նախարարության մեծ դահլիճում` Հայ-Ֆրանսիական Գործարարության Ակումբի (CAFA) աջակցությամբ կայացավ «ՍԻՏՐՈՆԻԿՍ ԱՐՄԵՆԻԱ» ՓԲԸ- ի կողմից «ՌԱՕ ՄԱՐՍ» ՓԲԸ և «ԵրՄՄԳՀԻ» ՓԲԸ տարածքներում հիմնված, ինչպես նաև «Զվարթնոց» օդանավակայանի տարածքում կազմակերպվող ազատ տնտեսական գոտիների վերաբերյալ շնորհանդեսը:

Շնորհանդեսի նպատակն էր` ծանոթացնել ֆրանսիական գործարար համայնքի ներկայացուցիչներին Հայաստանում ստեղծվող ազատ տնտեսական գոտիների հնարավորություններին:

Միջոցառմանը մասնակցում էին Հայաստանում գործող ֆրանսիական գործարար համայնքի մի շարք ներկայացուցիչներ, որոնց թվում էին` «Գրանթ Թորնթոն» ընկերության բաժնետեր, CAFA նախագահ Արման Փինարբասին, «Օրանժ Արմենիա» ընկերության տնօրեն Բրունո Դյութուան, «Բարսամինի Թուղթ» ընկերության հիմնադիր տնօրեն Քրիստոֆ լը Բարսը և այլոք:

ՀՀ էկոնոմիկայի նախարարության ներդրումային քաղաքականության վարչության պետ Հովհաննես Ավետիսյանը միջոցառման մասնակիցներին ներկայացրեց Հայաստանում ազատ տնտեսական գոտիների ստեղծման հիմնական նպատակները, ոլորտը կարգավորող իրավական դաշտը, Ազատ տնտեսական գոտում գործունեություն ծավալելու պայմանները, շահագործողներին տրվող առավելություններն ու արտոնությունները:

Շնորհանդեսի ավարտին ծավալվեց շահագրգիռ քննարկում, որի ընթացքում Ներդրումային քաղաքականության վարչության պետ Հովհաննես Ավետիսյանը և «Սինտրոնիքս Արմենիա» ՓԲԸ տնօրեն Արմեն Խաչատրյանը պատասխանեցին գործարարներին հուզող հարցերին և մանրամասն ներկայացրեցին Հայաստանի ազատ տնտեսական գոտիներում գործունեություն ծավալելու առանձնահատկությունները: