Շատ փողն ու պաշտոնն՝ ընդդեմ արդարադատության

Կենտրոն և Նորք-Մարաշ վարչական շրջանների ընդհանուր իրավասության դատարանի որոշմամբ՝ ԱԺ պատգամավոր Գուրգեն Արսենյանի որդին դատապարտվեց 4 տարի ազատազրկման՝ պատժի պայմանական չկիրառմամբ:

Հիշեցնենք, որ Գուրգեն Արսենյանին մեղադրանք է առաջադրվել, որ նա իր ընկերներ Արմեն Ներսիսյանի, Գուրգեն Գրիգորյանի և այլ անձանց հետ միասին՝ 2016թ. ապրիլի 17-ին, Երևան քաղաքում գործող «Կրիստալ» գիշերային ակումբի դիմաց, խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ՝ խմբի կազմում, որպես զենք օգտագործվող առարկայի գործադրմամբ կատարել է խուլիգանություն:

Դատաքննությունների ընթացքում, ըստ պատգամավորի որդու պաշտպանի ներկայացրած բնութագրերի, Գուրգեն Արսենյանը Մանկավարժական համալսարանում ցուցաբերել է պարկեշտ, աշխատասեր, ակտիվ ուսանողի վարք: Նա ուսման ընթացքում բարձր առաջադիմություն է ունեցել, իսկ մանկավարժա-դասախոսական կազմը պատգամավորի որդուն բնութագրել է որպես կիրթ եւ զուսպ երիտասարդի:

Սրանք այն հիմքերն էին, որոնք պատգամավոր Արսենյանը ջանք ու եռանդ չխնայելով՝ ձեռք էր բերել՝ իր որդու համար ներկայացնելով անթերի բնութագիր ու կենսակերպ, որոնց վրա հիմնվելով էլ՝ դատարանը նրա որդուն ազատեց իր կյանքի չորս տարիները ճաղերից այն կողմ անցկացնելու դաժան հեռանկարից: Փաստորեն, հայկական արդարադատությունը տեղի տվեց՝ պատգամավորի որդուն զերծ պահելով պատժախցում հայտնվելու սարսափից:

Ցավալի է, որ նույն դատաիրավական համակարգը նույնքան մեղմ և ներողամիտ չգնվեց «Սասնա ծռեր» զինված խմբին հաց հասցնելու և օժանդակելու մեջ մեղադրվող Արթուր Սարգսյանի նկատմամբ: Եթե պատգամավոր Արսենյանի որդին դատարանի դահլիճից ազատ արձակվեց նաև իր մասին տրված դրական բնութագրերի հաշվին, ապա Արթուր Սարգսյանին չփրկեցին այն տասից ավելի հիվանդությունները, որոնք նա ձեռք էր բերել կալանավայրում պահվելու ընթացքում: Եվ միայն նրա պաշտպանների կողմից ՄԻԵԴ-ին հասցերագրված դիմումը փրկեց իրավիճակը:

Հիշեցնենք, որ Սարգսյանի պաշտպանները դիմել էին Մարդու իրավունքների Եվրոպական դատարան (ՄԻԵԴ), որպեսզի անհապաղ միջոցներ ձեռնարկվեն նրան բուժում ապահովելու, անհրաժեշտության դեպքում քաղաքացիական հիվանդանոց տեղափոխելու համար:

Դատարանն արձագանքել էր այդ դիմումին՝  պարզաբանումներ պահանջելով Հայաստանի կառավարությունից, որից հետո էլ դեկտեմբերի 31-ին Սարգսյանն ազատ արձակվեց: 

Ստացվում է, որ եթե չլիներ ՄԻԵԴ-ի պահանջն ու ճնշումը ՀՀ կառավարության վրա՝  Արթուր Սարգսյանը հաց հասցնելու համար մինչ օրս էլ կշարունակեր մնալ ճաղերից այն կողմ՝ մինչդեռ այդ ծանրությունից ոմանք կարողացան շատ արագ ճողոպրել՝ պետական լծակների կիրառման և շատ փողի շնորհիվ: 

 Աղավնի Սուքիասյան