Գյուղացու մշակած ամբողջ բերքը պետք է ընդունվի վերամշակման. գյուղնախարար

ՀՀ գյուղատնտեսության նախարար Սերգո Կարապետյանի և ագրարային համակարգի տարբեր ոլորտներ ներկայացնող գործարարների ու արդյունաբերողների արդեն ավանդական դարձած հանդիպումները թևակոխում են նոր՝ ավելի նպատակային փուլ: Այսօր պտուղ-բանջարեղենի վերամշակման ձեռնարկությունների ներկայացուցիչների հետ կայացած հանդիպմամբ, փաստորեն, սկիզբ դրվեց պետության և մասնավորի միջև փոխհարաբերությունների կանոնակարգման առաջին քայլին:

«Հպարտությամբ պետք է արձանագրենք, որ վերամշակման ճյուղը մեր երկրում էական զարգացում է ապրել: Չմոռանանք, որ գյուղատնտեսության զարգացումը համահունչ պետք է լինի վերամշակող արդյունաբերության զարգացմանը: Այս առումով մենք նաև առաջատար ենք մեր հարևան երկրների համեմատությամբ, ուստի առաջացել է հարաբերությունների կանոնակարգման նոր հրամայական: Այսօր մենք ստորագրման ենք ներկայացնում կարևոր մի փաստաթուղթ՝ «ՀՀ գյուղատնտեսության նախարարության և հանրապետության պտուղ-բանջարեղենային պահածոների արտադրության ոլորտի ներկայացուցիչների միջև բուսաբուծության և պտուղբանջարեղենային պահածոների արտադրության ոլորտների բնականոն գործունեությունն ու զարգացումն ապահովելու նպատակով համագործակցության հուշագիր»: Այն իր էական դերակատարումն է ունենալու ինչպես ոլորտի զարգացման, այնպես էլ պետություն – մասնավոր հատված համագործակցության առավել հստակեցման տեսանկյունից», - հանդիպման սկզբում նշեց Սերգո Կարապետյանը: Հուշագիրը, որը կնքվում է 5 տարի ժամկետով, կողմերի համաձայնության դեպքում, կերկարաձգվի ևս 5 տարով:

Անդրադառնալով ընթացիկ տարվա զարգացումներին՝ նախարարը նշեց, որ ըստ կանխատեսումների, տարին հաջողվածներից է լինելու, առանձին մշակաբույսերից սպասվող բերքը զգալիորեն գերազանցելու է նախորդ տարվա ցուցանիշները. ուստի վերամշակողներին նույնպես լարված տարեշրջան է սպասվում, մանավանդ, որ մթերման գործընթացի պատշաճ կազմակերպմումը շարունակում է մնալ հանրապետության ղեկավարության ուշադրության կենտրոնում:

«Գյուղացու մշակած ամբողջ բերքը պետք է ընդունվի վերամշակման, ուստի այսօր արդեն պետք է ըստ ամենայնի նախապատրաստել գործընթացը», -ասաց նա:

Ստորագրելով հուշագիրը՝ հանդիպման մասնակիցներն իրենց գոհունակությունը հայտնեցին նման փաստաթղթի ստեղծման առիթով՝ վստահեցնելով, որ այն, իրոք, կնպաստի պետություն – մասնավոր հատված համագործակցության խորացմանը:

Ներկայացվեցին նաև այն մտահոգություններն ու դիտարկումները, որոնց լուծման մեջ նախարարությունը կարող է ունենալ իր ծանրակշիռ դերակատարումը:

Արձագանքելով դրանց՝ նախարարը պատրաստակամություն հայտնեց հնարավորինս սեղմ ժամկետներում և արդյունավետորեն մոտենալ խնդիրների բարձրացմանն ու լուծմանը:Իսկ վերջինիս համար Սերգո Կարապետյանը կարևորեց հուշագրի շրջանակներում համապատասխան միավորումներ ստեղծելու աշխատանքները:Որոշվեց առաջիկա հանդիպումներից մեկը նվիրել պահածոյագործությանն օժանդակող ծառայությունների ներկայացուցիչների հետ հանդիպմանը, ծանոթանալ և ըստ ամենայնի ընթացք տալ նաև վերջիններիս խնդիրներին: