Խմելու ջրի ոլորտում գործող ընկերությունները ներկայացրեցին տարեկան հաշվետությունները

Հանրապետությունում խմելու ջրամատակարարման եւ ջրահեռացման ոլորտում գործող ընկերությունները ՀՀ փոխվարչապետ, տարածքային կառավարման նախարար Արմեն Գեւորգյանին, ՏԿՆ ջրային տնտեսության պետական կոմիտեի նախագահ Անդրանիկ Անդրեասյանին եւ շահագրգիռ այլ մարմինների ղեկավարներին այսօր ներկայացրեցին 2011 թ. տարեկան հաշվետությունները:

«Երեւան Ջուր» ՓԲԸ հաշվետվության համաձայն՝ մասնավորապես կրկնապատկվել են վերականգնման եւ պահպանման աշխատանքների ծավալները՝ 600 մլն դրամից հասնելով 1,2 մլրդ դրամ, այն դեպքում, երբ այդ ընթացքում սակագինը ընկերության համար նվազել է 21 դրամով: Փոխվարչապետը հորդորեց ընկերության սպասարկման տարածքում ընդգրկված երեք տասնյակից ավելի գյուղական համայնքներին նույնպիսի ուշադրություն դարձնել, ինչպես մայրաքաղաքին: Նա նաեւ առավել մանրամասն տեղեկանք պահանջեց գյուղական համայնքների սպասարկման վերաբերյալ:

«Հայջրմուղկոյուղի» ՓԲԸ տնօրեն Պատրիկ Լորենը ներկայացնելով ընկերության հաշվետվությունը՝ մասնավորապես նշեց, որ իրենց սպասարկման տարածքում ջրամատակարարման միջին ցուցանիշն ավելացել է մեկ ժամով, կրճատվել են էլեկտրաէներգիայի ծախսերը:

Ջրամատակարարման միջին օրական տեւողության բարելավվման մասին է նշվում նաեւ «Լոռի-ջրմուղկոյուղի», «Շիրակ-ջրմուղկոյուղի» եւ «Նոր Ակունք» ընկերությունների հաշվետվությունում: Տեղեկացվեց, որ հատկապես շոշափելի աճ է գրանցվել Լոռիի եւ Շիրակի ցուցանիշների առումով, որտեղ ջրամատակարարման տեւողության վերաբերյալ պայմանագրային թիրախները գերազանցվել են:

Փոխվարչապետը ընկերությունների ներկայացուցիչներին հորդորեց պատշաճ կերպով իրականացնել պայմանագրային պարտավորությունները, սերտորեն համագործակցել ՏԻ մարմինների հետ, ինչպես նաեւ բնակչությանը ժամանակին տեղեկացնել առաջացած խնդիրների կամ կատարվող աշխատանքների մասին: