8 ընկերություններ՝ նախաորակավորված մասնակիցների ցանկում

Տնտեսություն 31 Մայիս, 2012 1:48

Մայիսի 30-ին ՀՀ տրանսպորտի և կապի նախարարությունում տեղի ունեցավ «Հայաստանի Հանրապետությունում վերգետնյա թվային հեռուստա-ռադիոհեռարձակման համակարգի ներդրման և կառավարման ծառայություններ» գնման գնահատող հանձնաժողովի նիստը: Նիստը նախագահում էր գնահատող հանձնաժողովի նախագահ, ՀՀ տրանսպորտի և կապի նախարար Մանուկ Վարդանյանը: Նիստում ամփոփվեցին գնման գործընթացին ներկայացված նախաորակավորման հայտերի գնահատման արդյունքները: 30.05.2012

Գնահատող հանձնաժողովի որոշմամբ նախաորակավորված մասնակիցների ցանկում ընգրկվեցին նախորակավորման հայտեր ներկայացրած բոլոր 8 ընկերությունները՝

«Արմենիան Դեյթաքոմ Քամփնի»ՓԲԸ (ՀՀ)
«Լանս» ՓԲԸ (ՀՀ)
«Նեքսիս Ըլայնս Լիմիթեդ» Ընկերություն (Հոնգ Կոնգ) և «Յուքոմ» ՍՊԸ (ՀՀ) կոնսորցիում
«Հարիս Կոմյունիկեյշնզ Սի-Այ-Էս» ՍՊԸ (Ռուսաստան)
«Ի.Ս.Պ.Ա- ՍԱՏ» ՍՊԸ (Ռուսաստան)
«Սավ-Օն-Մոնոլան»(ԱՄՆ) /Sav-On-Monolan,Inc.(USA)/
«Ղ-Տելեկոմ» ՓԲԸ (ՀՀ)
«Դիջիտալ Սերվիս» (Բուլղարիա) /Digital Service (Bulgaria):

Նիստից հետո երեք աշխատանքային օրվա ընթացքում նախաորակավորված բոլոր մասնակիցներին գնահատող հանձնաժողովի քարտուղարի կողմից էլեկտրոնային եղանակով միաժամանակ կտրամադրվի մրցակցային երկխոսության ընթացակարգի հրավերը, որով գնման առարկայի հատկանիշները սահմանվում են որպես գործառութային (ֆունկցիոնալ) նկարագրերի նախնական տարբերակ: Նախաորակավորված մասնակիցների կողմից հայտերը պետք է ներկայացվեն երկու փուլով: Գնահատող հանձնաժողովի որոշմամբ առաջին փուլի հայտերի ներկայացման ժամկետը սահմանվել է 21 օր՝ հաշված հրավերը նախաորակավորման մասնակիցներին տրամադրելու օրվանից: Առաջին փուլով պետք է ներկայացվեն գնման առարկայի գործառութային (ֆունկցիոնալ) նկարագրերի վերաբերյալ առաջարկները` առանց գնային առաջարկի: Նկարագրերի վերաբերյալ առաջարկները ներկայացվելու օրվան հաջորդող 10 օրվա ընթացքում հայտեր ներկայացրած մասնակիցները կհրավիրվեն միաժամանակյա բանակցությունների, որի արդյունքում ձևավորված գնման առարկայի նկարագրերի և ֆունկցիոնալ պահանջների վերանայված տարբերակը կներկայացվի ՀՀ կառավարություն՝ հաստատման: ՀՀ կառավարության կողմից հաստատվելուց հետո, գնման առարկայի վերջնական տարբերակը կտրամադրվի մասնակիցներին՝ երկրորդ փուլի հայտը ներկայացնելու համար: Երկրորդ փուլի հայտը պետք է պարունակի գնային և տեխնիկական առաջարկները, հայտատուի որակավորման հատկանիշների մասին տվյալները: