Այն երեք ոլորտները, որոնք կառավարությունը նախաձեռնել է խթանել, քիչ են Սերժ Սարգսյանի խոստումների համեմատ. Վազգեն Սաֆարյան

Այն երեք ոլորտները, որոնք կառավարությունը նախաձեռնել է խթանել՝ սննդարդյունաբերությունը, մասնավորապես՝ կոնյակագործությունը, ապա՝ դեղագործությունը, և հաջորդը՝ ճշգրիտ ճարտարագիտությունը, քիչ են և բավարար չեն այն խոստումների համեմատ, որ տվել է Սերժ Սարգսյանը տարբեր շրջաններում ունեցած հանդիպումների ժամանակ։ Նման կարծիք այսօր լրագրողների հետ հանդիպմանն արտահայտեց Հայրենական ապրանքարտադրողների միության նախագահ Վազգեն Սաֆարյանը:

Նրա խոսքերով, նոր կառավարության ձևավորման գործընթացն իր ժամանակացույցի մեջ է։ ՀՀԿ–ն արդեն որոշել է, թե ով պետք է լինի կառավարության ղեկավարը, բայց խնդիրն այսօր այլ հարթությունում է՝ թե ինչպիսի՞ կառավարություն կձևավորվի։

«Այն մոտեցումները, որոնք, որ մինչև այժմ գոյություն են ունեցել կառավարության գործառույթներում, պետք է ավելի ակտիվ զարգանան, մասնավորապես արտահանմանն ուղված արդյունաբերական քաղաքականությունը։ Պետք է նրանք ավելի կոնկրետանան և որոշակի ոլորտներ որդեգրեն»,– ասաց նա։

Անդրադառնալով Սերժ Սարգսյանի նախընտրական խոստումներին՝ բանախոսը նշեց, որ Էրեբունու համայնքում ընտողների հետ հանդիպմանը Սարգսյանը կարևորել է արդյունաբերությունը և դրա զարգացման գործառույթները։

«Նա ասել է, որ «պետք է կառավարությունը դեմքով շրջվի դեպի արդյունաբերությունը»։ Այդ իսկ պատճառով նոր կառավարությունը, որ պետք է ձևավորվի, կարծում եմ իր համակարգում պետք է ներառի արդյունաբերության և արտաքին առևտրի նախարարություն, որը էապես կտարբերվի իր կառուցվածքով։ Այն պետք է ունենա ոչ միայն ֆունկցիոնալ նշանակություն օրենսդրական գործառույթներով համակարգը կարգավորելու, այլ նաև՝ ճյուղային նշանակություն, որը հնարավորություն կունեենա այդ նախարարությանը միջոցներ հայթայթել, և այդ միջոցները արդյունաբերության մեջ ներդնելու համար»,– ասաց Սաֆարյանը և հավելեց, որ սա միակ միջոցն է, որով այս կառավարությունը կտարբերվի նախորդ կառավարությունից։

«Գործընթացներում պետք է կարևորվի պետության մասնակցությունը արդյունաբերության զարգացման մեջ»,– ասաց Սաֆարյանը։