Դոլարի արժևորումը դրամի նկատմամբ դրական երևույթ է. Վազգեն Սաֆարյան

Դոլարի արժևորումը դրամի նկատմամբ դրական երևույթ է։ Այս մասին ասյսօր լրագրողների հետ հանդիպմանն ասաց Հայրենական ապրանքարտադրողների միության նախագահ Վազգեն Սաֆարյանը, և հավելեց, որ դա կնպաստի արտահանման ծավալների աճին։

Նրա խոսքերով՝ դրամը հանիրավի արժևորված էր, բայց գործընթացները հանգեցրին նրան, որ ազգային արժույթը թուլացավ։

«Ներմուծողները պատրաստ չէին դրամի թուլացմանը և վնասներ են կրում, իսկ ՀՀ տնտեսական մրցակցության պաշտպանության պետական հանձնաժողովը պետք է խստացնի վերահսկողությունը որոշ շուկաների վրա, օրինակ՝ շաքարավազի»,– ասաց նա։

Սաֆարյանը դրամի արժեզրկմամբ պայմանավորեց նաև վերին շաբաթների ընթացքում որոշ պարենային ապրանքների թանկացումները, քանի–որ դրանց մեծ մասը ներմուծվում է։

Բանախոսը, անդրադառնալով նաև այն փաստին, որ վարչապետը որոշակի քայլեր արել է արդյունաբերության ուղղությամբ, նշեց, որ պետք է քայլեր ձեռնարկել նաև արդյունաբերության հայեցակարգի մշակման համար:

«Մենք արտահանում ենք 127000 տոննա խտանյութ: Պետք է արտահանենք նաև սև պղինձ, իսկ երկրորդ ուղղությունը քիմիական արդյունաբերությունն է, որի վրա պետք է ուշադրություն դարձնել»,– ասաց նա:

Սաֆարյանի խոսքերով նոր կառավարությունում նախարարների փոփոխություններ չեն լինի, բացառությամբ ԲՀԿ–ական նախարարների, որոնց կփոխարինեն ՀՀԿ-ականները:

«Վարչապետն ունի հնարավորություն ներկայացնելու մասնագետներ, ովքեր կղեկավարեն այս կամ այն ոլորտը»,– ասաց նա և հավելեց, որ չնայած նրան, որ երբեք Ճապոնիայի նման զարգացած պետություն չենք դառնա, այնուամենայնիվ պետք է ընդօրինակենք նրա փորձը, պետք է մտածենք արդյունաբերությունը վարկավորելու ուղղությամբ։