Էստոնիայում կայացած աշխատաժողովում ներկայացվել է Հայաստանի փորձը

Պետական եկամուտների կոմիտեի պատվիրակությունը ս.թ. հունիսի 4-ից 5-ը Էստոնիայում մասնակցել է Համաշխարհային մաքսային կազմակերպության (ՀՄԿ) կողմից կազմակերպված «Համաշխարհային մաքսային կազմակերպության տվյալների մոդել» խորագրով աշխատաժողովին:

Աշխատաժողովին, որին մասնակցում էին ավելի քան երկու տասնյակ երկրների մաքսային ծառայությունների ներկայացուցիչներ, ՀՄԿ աշխատակիցների, ինչպես նաև ՀՄԿ-ի կողմից հավաստագրված մասնագետների կողմից ներկայացվեց տվյալների մոդելը, կիրառման առավելությունները, ազգային տվյալների համադրումը ՀՄԿ տվյալների մոդելին, բիզնես գործընթացների մշակումը և այլ թեմաներ:

Որպես ՀՄԿ կողմից հավաստագրված մասնագետ՝ ՀՀ ԿԱ Պետական եկամուտների կոմիտեի տեղեկատվական տեխնոլոգիաների վարչության պետ Միքայել Փաշայանը համաժողովի ընթացքում անցկացրեց երկու դասախոսություն՝ «ՀՄԿ տվյալների մոդելն ու մեկ պատուհան սկզբունքը» և «Ազգային տվյալների համադրումը ՀՄԿ տվյալների մոդելին՝ ՀՀ մաքսային ծառայության օրինակով» թեմաներով:

Նշենք, որ տվյալների մոդելը տվյալների ստանդարտացման և ներդաշնակեցման գործիք է, որը Կիոտոյի վերանայված կոնվենցիայի, ՀՄԿ անվտանգության շրջանակային ստանդարտներին համապատասխան հնարավորություն է տալիս խթանել առևտուրը, պարզեցնել արտաքին առևտրի կազմակերպման ընթացակարգերը, բարձրացնել փոխադրումների անվտանգությունը:

Պետական եկամուտների կոմիտեն դեռևս 2011թ-ին իրականացրել է մաքսային հայտարարագրի տվյալների համադրում ՀՄԿ ստանդարտներին, որը միտված է նպաստելու «Մեկ պատուհան» սկզբունքի ներդրմանը, մաքսային սահմանով տեղափոխվող ապրանքների վերաբերյալ այլ երկրների հետ տեղեկատվության փոխանակման գործընթացների պարզեցմանը:

ՀՀ ԿԱ ՊԵԿ պատվիրակությունը ս.թ. հունիսի 6-ից 8-ը Էստոնիայում կմասնակցի նաև 2012թ. ՀՄԿ տեղեկատվական տեխնոլոգիաների համաժողովին և ցուցահանդեսին: