Տխուր թվեր Հայաստանի համար

Վիճակագրություն. 2017 թվականի առաջին եռամսյակում գործազրկության մակարդակը Հայաստանում կազմել է 19%, նախորդ տարվա 18.3% համեմատ: Այս մասին են վկայում ՀՀ Ազգային վիճակագրական ծառայության տվյալները: Գրանցված գործազուրկների թիվը Հայաստանում 2017-ի հունիսի 1-ին կազմել է 78,2 հազար, տարեկան անկումը`1.3%, 2016-ի 6,6%-ի փոխարեն: Այդ թվում կանայք կազմել են 51.5 հազար (տարեկան անկումը` 3,7%), իսկ տղամարդիկ` 26.7 հազար (տարեկան անկումը` 0.3%): Հաշվետու ամսաթվի դրությամբ, Հայաստանում կարողացել են աշխատանքի տեղավորվել 637 քաղաքացի կամ աշխատանք փնտրողների ընդհանուր թվի 0.7%-ը, ինչը 7.3% -ով պակաս է մեկ տարի առաջվա ցուցանիշից: 2017 թվականի հունիսին աշխատանք փնտրողների թիվը կազմել է 93,4 հազար մարդ, տարեկան անկումը` 2.5%: Գործազուրկների ընդհանուր թվով առաջին տեղում է Շիրակի մարզը - 13.9 հազար, որին հաջորդում են` Երևանը - 11.8 հազար, Լոռու մարզը - 9.8 հազար, Կոտայքի մարզը - 9.1 հազար և Արարատի մարզը` 6,8 հազար մարդ: 2017 թվականի հունիսի 1-ի դրությամբ աշխատանքի տեղավորման գործակալություններն ստացել են 1496 հայտ (տարեկան անկումը` 14.1%): Ըստ ՀՀ Կենտրոնական բանկի կանխատեսման, Հայաստանում գործազրկության մակարդակը 2017 -ին կկազմի 18.5%, 2018-2019 թվականներին կնվազի 0.3-0.4 տոկոսային կետով, մինչև 18-18,2% և 17,6-18%: Ընդ որում, ԿԲ նախորդ` նոյեմբերի կանխատեսումով գործազրկության մակարդակը նախատեսված էր` 18.3%:

Գործազրկության ամենաբարձր մակարդակը երիտասարդների շրջանում է. 20-24 տարիքային խմբի շրջանում այն հասնում է 34.5%-ի, իսկ 25-29 տարիքային խմբի շրջանում` 24.3%-ի: Կրթությունից աշխատաշուկա անցումն ապահովող արդյունավետ ուղիների պակասը, մասնավորապես` փոքր քաղաքներում, երիտասարդների շրջանում գործազրկության հիմնական գործոններից է;

Եվ ահա գործազրկության այս տխուր թվերի ֆոնին աշխատանքի և սոցիալական հարցերի նախարարությունից տեղեկացնում են, որ զբաղվածության կարգավորման պետական ծրագրի շրջանակներում 523 քաղաքացու կարողացել են աշխատանքով ապահովեն: Անշուշտ սա դրական է և ողջունելի: Զարմանալի է միայն պաթոսը և այն գլուխ գովանքը որով նախարարությունը ներկայացնում է իր այս «հսկայական» ձեռքեբերումը: Մի երկրում , որտեղ գրանցված գործազուրկների թիվը հասնում է 80 հազարի, 523 հոգուն աշխատանքով ապահովելը՝ կաթիլ է գործազրկության օվկիանոսում:  Ընդ որում, այս զբաղվածության կարգավորման պետական ծրագրի շրջանակներում՝ երիտասարդների մասնագիտական վերապատրաստումը այսուհետ իրականացվելու է ՀՀ կրթության և գիտության նախարարության կողմից երաշխավորված կազմակերպության միջոցով:  Ի դեպ՝ կրթության մասին: Հայաստանյան բուհերում ավանդաբար պահպանվող մի շարք ֆակուլտետներ մասնագետներ են պատրաստում, ովքեր հետագայում աշխատաշուկայում իրենց տեղը չեն գտնելու մի պարզ պատճառով՝ պահանջարկ չկա: Որոշ մասնագիտությունների դեպքում էլ պահանջարկ կա, սակայն առաջարկ չկա, օրինակ՝ ծրագրավորման նոր լեզուներ են պետք, որ որևէ տեղ չեն սովորեցնում, սովորեցնում են Պասկալ, ինչը ոչ միայն անհրաժեշտ չէ ուսանողին, այլև խանգարում է: Գուցե երիտասարդների շրջանում գործազրկության հաղթահարման ծրագրերը պետք է սկվեն հենց կրթական համակարգի բարեփոխումից, որտեղ ակնհայտ է՝ մի բան այնպես չէ:

Հայաստանում գործազրկությունը 19% է, իսկ Ադրբեջանում՝ 5%։ Ի՞նչ եք կարծում այս թվերի հետ կապված արժի՞ մտահոգվել, թե՞ «Իսկանդերները» փարատում են բոլոր մտահոգությունները:

 Ստելլա Խաչատրյան