Ինչո՞ւ է թանկացել ալյուրը. մեկնաբանում է Արմեն Պողոսյանը

Սպառողների միության նախագահ Արմեն Պողոսյանը, Լուրեր.com–ի հետ զրույցում անդրադառնալով ալյուրի գնի բարձրացմանը, ասաց, որ դա բնական է, իսկ պատճառն էլ՝ ակնհայտ։ Նա նշեց, որ պատճառն այն է, որ Հայաստան ներկրվող ալյուրի 99%–ը մի կազմակերպություն է ներկրում։

«Եթե միայն մի կազմակերպությունը Հայաստան է ներկրում 99% ալյուր, եթե բենզին ներկրում են երկու ընկերություններ՝ մեկը 2,5%, մյուսը՝ 41,5%, ապա թանկացումները բնական են»,–ասաց Պողոսյանը։

Նրա խոսքերով՝ նման մենաշնորհներ կան նաև մյուս ասպարեզներում, ինչի հետևանքով թելադրում են գներն այնպես, ինչպես ուզում են։

«Երբ համաշխարհային գների աճ է նկատվում, նրանք անմիջապես հիմնավորում են, որ համաշխարհային գինն է բարձրանում, բայց երբ հակառակն է լինում, ուրիշ հիմնավորում են գտնում, քանի որ միշտ էլ կարելի է արդարացումներ գտնել»,– ասաց նա։

Պողոսյանը նշեց նաև, որ այն, ինչը տրամաբանական է, դա նորմալ է, բայց այն, որ թանկացումները կապ չունեն համաշխարհային գների հետ, դա պետք է պատժվի։

«Կա պետական հանձնաժողով՝ տնտեսական մրցակցության պետական հանձնաժողովը, որի պարտականությունն է այս հարցերը բացահայտել։ Դա ոլորտը կարգավորող միակ մարմինն է, որը կոչվում է պետական և իր պարտականությունները պետք է կատարի»,– ասաց նա։

Պողոսյանը նշեց նաև, որ մեր օրենսդրությամբ մենաշնորհն արգելված չէ, բայց և ասաց, որ պետք է ուշադրություն դարձնել այն հանգամանքին, որ եթե շուկայի 30%–ից ավելին գրավում է որևէ ձեռնարկություն, ապա անհրաժեշտ է, որ այն լինի առանձնահատուկ ուշադրության կենտրոնում։

«Նրա ֆինանսական միջոցները պետք է ստուգվեն, պետք է ստուգվի, թե որքան են եկամուտները ու տուգանքները լինեն օրինական։ Եթե օրինական են՝ ուրեմն լավ է, ինչը կասկածելի է, որ այդպես է, ու եթե կա անօրինականություն, ուրեմն պետք է պատժվի»,– եզրափակեց Պողոսյանը։

Հիշեցնենք, որ վերջերս մամուլում լուրեր են շրջանառվում, որ վերջին 2 ամսվա ընթացքում բարձրորակ ալյուրի 50 կգ-անոց պարկի մեծածախ գինը բարձրացել է ավելի քան երկու հազար դրամով: Գարնան սկզբին նշված ալյուրի պարկի մեծածախ գինը եղել է 9 հազար դրամի սահմաններում՝ 25 դոլարին համարժեք: Ալյուրի մեծածախ գինն աոաջին անգամ բարձրացել է ապրիլին՝ 2 դոլարով: Ըստ գործարարների, այս թանկացումը ներկրողները որևէ կերպ չեն հիմնավորել՝ գինը բարձրացրել են և վերջ: Մայիսի կեսին ալյուրի մեծածախ գինը կրկին բարձրացել է, և 1 պարկ ալյուրն սկսել է վաճառվել 11 հազար 300 դրամով: Այս վերջին թանկացումը ներկրողները պայմանավորել են դոլարի փոխարժեքի բարձրացմամբ:

Հացի գների այս թանկացումներին առայժմ չեն արձագանքել, քանի որ փռերը դեռ «հին» ալյուրն են սպառում և հույս ունեն, որ գները կվերադառնան նախկին մակարդակին: Եթե առաջիկա օրերին գները չիջնեն, ապա հացթուխները ստիպված կլինեն ալյուրի թանկացմանը համարժեք՝ բարձրացնել նաև հացի գինը: