Ստորագրվեց համաձայնագիր` Սիսիանի եւ Գորիսի շրջանների գյուղական համայնքների աջակցության ծրագրի վերաբերյալ

ՀՀ տարածքային կառավարման նախարարությունում այսօր ՀՀ տարածքային կառավարման նախարարի առաջին տեղակալ Վ. Տերտերյանը, Սյունիքի մարզպետի տեղակալ Ա. Դոլունցը եւ Շվեյցարիայի զարգացման եւ համագործակցության գործակալության Հարավային Կովկասում տարածաշրջանային գրասենյակի տնօրեն Ռ. Շոխը ստորագրեցին համաձայնագիր` Սիսիանի եւ Գորիսի շրջանների գյուղական համայնքների աջակցության ծրագրի երրորդ փուլի վերաբերյալ:

Ծրագիրն իրականացվում է 40 գյուղական համայնքներում եւ ուղղված է անասնապահության ոլորտի զարգացմանը, ֆերմերների համար կայուն եկամտի հնարավորությունների ստեղծմանը:

ՏԿ նախարարի առաջին տեղակալ Վ. Տերտերյանը կարեւորեց Շվեյցարիայի կառավարության կողմից Հայաստանում իրականացվող ծրագրերը եւ շնորհակալություն հայտնեց արդյունավետ եւ շարունակական համագործակցության համար: Նա գոհունակություն հայտնեց Սիսիանի եւ Գորիսի շրջանների գյուղական համայնքների աջակցության ծրագրի ընթացքից եւ վստահություն հայտնեց, որ ծրագիրը երրորդ փուլում կիրականացվի նույնքան արդյունավետ, որքան նախորդ փուլերում:

Հարավային Կովկասում տարածաշրջանային գրասենյակի տնօրեն Ռ. Շոխի կարծիքով`Գյուղական համայնքների աջակցության ծրագիրը մեկնարկել է բավականին հաջող եւ շարունակում է արդյունավետ իրականացվել: Նա միաժամանակ շնորհակալություն հայտնեց ՀՀ կառավարությանը` աջակցության համար եւ տեղեկացրեց, որ Շվեյցարիան նախատեսում է Հայաստանում կրկնապատկել իր բյուջեն եւ շարունակել Հայաստանում ֆերմերային տնտեսությունների աջակցության ծրագրերը` ավելացնելով նոր բաղադրիչներ: Ներկայումս ՀՀ գյուղատնտեսության նախարարության հետ քննարկվում է Սյունիքի մարզում անասնաբուժական ծառայությունների բարելավմանը, մասնավորապես՝ բրուցելյոզի կանխարգելմանն ուղղված ծրագիր իրականացնելու հարցը:

Վ. Տերտերյանը եւ Ռ. Շոխը քննարկեցին նաեւ իրականացվող այլ ծրագրերի ընթացքին վերաբերող հարցեր: