Քննարկվեցին ոռոգման ընթացիկ խնդիրներ

ՀՀ փոխվարչապետի, տարածքային կառավարման նախարարի պաշտոնակատար Արմեն Գեւորգյանն այսօր խորհրդակցություն անցկացրեց Արմավիրի մարզպետարանում, որին մասնակցում էին մարզպետ Աշոտ Ղահրամանյանը, ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը, մարզի Ջրառ եւ Ջրօգտագործող ընկերությունների (ՋՕԸ) ղեկավարներ:

Քննարկվեցին մարզում ոռոգման հետ կապված ընթացիկ իրավիճակին առնչվող հարցեր: Նշվեց, որ մարզի մի շարք ՋՕ ընկերությունների սպասարկման տարածքներում գյուղացիական տնտեսություններին ոռոգման անհրաժեշտ ջրաքանակով ապահովելու հետ կապված որոշակի խնդիրներ են առաջացել:

ՋՕԸ ղեկավարներին հանձնարարվեց այլընտրանքային լուծումներ առաջարկել` ջրամատակարարման առումով խնդիրներ ունեցող տարածքներ ջուր հասցնելու վերաբերյալ: Ա. Գեւորգյանը մեկ անգամ եւս հորդորեց առավել կազմակերպված աշխատանքներ իրականացնել` գյուղացիական տնտեսություններին անհրաժեշտ ջրաքանակով ապահովելու համար: