ՀՀ գյուղատնտեսության նախարարությունը աջակցում է գյուղմթերքների սպառման հարցում

Գյուղացիական տնտեսությունների կողմից արտադրված պտղի, բանջարեղենի և խաղողի իրացման նպատակով և մթերումների գործընթացին նպաստելուն զուգահեռ՝ ՀՀ գյուղատնտեսության նախարարությունն աշխատանքներ է իրականացնում նաև դրանց վաճառքի աջակցության ուղղությամբ:

Սկսած 2011 թվականի օգոստոսի 21-ից՝ Երևանի Կասյան փողոցի վերին հատվածում շաբաթ և կիրակի օրերին կազմակերպվել են գյուղատնտեսական մթերքների տոնավաճառներ: Գյուղացիական տնտեսությունների մասնակացությունը տոնավաճառներին անվճար է: Տոնավաճառին միայն սեփական արտադրանքը ներկայացնող գյուղացիական տնտեսությունների մասնակցությունն ապահովելու և միջնորդների մասնակցությունը բացառելու նպատակով սահմանվել և հետևողականորեն կիրառվել են հատուկ ընթացակարգեր: Մասնակցությունը տոնավաճառին թույլատրվել է միայն ԳԱՄԿ-երից ստացված համապատասխան տեղեկանքներով , որոնք հավաստել են, որ վաճառքի ներկայացվող մթերքը տվյալ մասնակցի սեփական արտադրանքն է:

Տոնավաճառների մասնակիցներին անվճար հիմունքներով տրամադրվել են հարմարավետ վրաններ, վաճառասեղաններ, կշեռքներ, սայլակներ և արտահագուստ: Տոնավաճառները ուղեկցվել են համերգային ծրագրերով, իսկ տարածքում հասարակական կարգը և երթևեկությունը կարգավորվել է ՀՀ ոստիկանության կողմից: Տոնավաճառների ավարտին ապահովվել է տարածքի մաքրումը:

2011 թվականին կազմակերպվել է 36 տոնավաճառ: Միջին հաշվով 1 տոնավաճառին մասնակցել է շուրջ 200 գյուղացիական տնտեսություն: Ընդհանուր առմամբ՝ 36 տոնավաճառներին մասնակցելու համար գրանցվել են շուրջ 7029 գյուղացիական տնտեսություններ, որոնք ներկայացրել են 242 գյուղական համայնքներ: Տոնավաճառներին պարբերաբար մասնակցել են նաև մի շարք գյուղատնտեսական կոոպերատիվներ և գիտական կենտրոններ: Յուրաքանչյուր տոնավաճառի ժամանակ վաճառքի է ներկայացվել 50-60 տեսակի և իրացվել շուրջ 60 տոննա գյուղամթերք:

Ներկայումս ՀՀ գյուղատնտեսության նախարարության, Երևանի քաղաքապետարանի և այլ շահագրգիռ կառույցների հետ աշխատանքներ են տարվում գյուղատնտեսական մթերքների տոնավաճառները մայրաքաղաքում ավելացնելու ուղղությամբ: Հուլիսի սկզբից Կասյան փողոցում երևանցիներին ծանոթ վերագործարկվող  տոնավաճառին կհետևեն ևս երկու նմանատիպ շուկաներ: